"Абдыш-Ата” футболдук клубунун тарбиялануучусу, 11 жаштагы Эрбол “Барселонанын” академиясына өтүп кубанып жүрсө, аталган клубдун башка тарбиялануучусу Эмил Кенжесариев азырынча артка чегинүүгө аргасыз болууда. Жыл башында Эмилдин Казакстандын “Актөбөдөн” Азиянын Чемпиондор Лигасында ойногон ташкенттик “Бунёдкорго” өтүшү карьерасындагы жогору карай дагы бир тепкич катары бааланган. Тилекке каршы, оюн тажрыйбасынын жетишсиздигинен мекендешибиз команда жетекчилигине келишимди бузуу өтүнүчү менен кайрылууга мажбур болгон (команданын расмий сайтында “Эмил негизги курамдан бекем ордун таба албады” деп айтылат).
Айта кетсек, Эмил ташкенттик клубдун курамында 6 жолудан гана Өзбекстандын чемпиондугунда жана Азиянын Чемпиондор Лигасында майданга чыккан. Учурда Кенжесариев кайра “Актөбөгө” барып кошулуп, 1 беттешке катышууга жетишиптир. Эмил, маанайыңды түшүрбө, мындан ары карьераң вертикалдуу абалда гана өссүн демекчибиз.
0
