– Ильяз эмнеси менен сени арбап алган?
– Башка көп балдарга караганда кыялы жакшы. Көп эшикке чыгып, эки жактарга баспайт. Ооба, гастролдорго барат. Бирок ал жумушу да.

– Үйлөнгөндөн кийин башка кылыктары чыгып, таң калтырдыбы?
– Башында мен Ильязды чечкиндүү жигит катары көр­гөм. Үйлөнгөндөн кийин өзүнүн оюн айта албаган адам экенин түшүндүм. Өз оюн айта албай кыйналып, унчукпай жүрө берет. Бир нерсени сурасам, анын ордуна башкалар айтып, чечип коюшат. Өзүнүн эмне каалап жатканын билбей калам. Көп сүйлөбөгөндүгү да жага бербейт.

– Жини келгенде эмне кыласың?
– Ильяздын жини келгенде беттери, көздөрү кызарып калат. Ошенте баштаганда эле билем да, унчукпай отуруп калам. Бирок анын жинин келтирүү кыйын.

– Ильяздын күйөрмандары азыркыга чейин эшик каккылашса керек?
– Ооба, бир кыз бар. Азыр деле келе берет. Андайларды кайненем, башкалар мага жеткирбей эле жөнөтүп коюшат.

– “Азап” тасмасына бир кыз менен тартылып жатканда сени ал жөнүндө билбейт деди эле. Билгенден кийин кантип жазаладың?
– Жиним келди аябай. Бирок мен билген учурда ал Казакстанда болчу. Келгенче жиним тарап кетиптир.

– Үйгө келгенде кара жумушка каралашабы?
– Ал ыр жазып эле студияда күнүн өткөрбөсө, кара жумуш менен иши да жок.

– Кандай курмандыктарга бардың жолдошуң үчүн?
– Менин барган курмандыгым ушул – киного, клипке башка кыздар менен тартылганга уруксат бергеним.

– Турмушка чыкканга чейин жолдошуңду кандай элестетчү элең?
– Мен Ильяздын күйөрманы деле эмес болчумун. Бирок «эгер мен өзүмдүн үйлөнүү тоюмду элестетсем, Ильяз жанымда тургансый берет» деп баарына айта берчүмүн.

– Азыр кош бойлуу эмессиңби, Ильязга эркелеп жатасың да, ээ?
– Ооба. Айтканымдын баарын кылат. Бирок бир жолу түндө туруп алып, аябай Кола ичким келген. Айтсам, “түнкү саат үчтө кайда барам, уктачы” деп барбай койгон.

– Атактуунун аялы болуу азаппы же ырахатпы?
– Азабы менен ырахаты экөө бирдей эле болсо керек. Азапты деле ырахаттай кылып кабыл алса болот. Бир чети кыйын эле.

Перизат Музуратбекова
star@super.kg