Коргоо министри Таалайбек Өмүралиев министрликтин 1600 офицеринин үйү жок экенин Жогорку Кеңештин жыйынында маалымдады. Жыйында Бишкектеги Дайыр Асанов атындагы Аскердик окуу жайынын аймагында турак үйлөр курулуп жаткандыгына байланыштуу маселе каралган. Коргоо министринин айтымында, 2000дей офицердин 400дөйүнүн гана үйү бар. "Аскер кызматчыларын үй менен камсыздоо маселеси акыркы 20 жылда көз жаздымда калып келет. Ушундан улам биз үй куруу үчүн сырттан акча таап, Кытай тараптын колдоосу менен көп кабаттуу эки үйдү курууну көздөп жатабыз",- деди министр. Бирок министрлик сунуштап жаткан жер өкмөттүн менчиги болгондуктан, ЖК Бишкектеги Дайыр Асанов атындагы Аскер лицейинин аймагында көп кабаттуу үй курууга тыюу салды. Учурда аскер кызматкерлери үчүн үй курууга башка жер тилкеси каралууда.