“БИР УУЧ СОГУШЧАНДАР ШААРЛАРДЫ ЭЭЛЕШЕТ”
“Курманбек Бакиев Кыргызстанга келип, бийликти басып алат экен” деген дүрбөлөң кеп желдей тарады. Мындай маалыматты биринчилерден болуп Элдик коргоо комитетинин башчысы Абдимажит Мадмаров коркпой-үркпөй туруп эле балп эттирди. Өлкөдөгү азыркы бийликти басып алуу үчүн атайын согушчан күчтөр даярданып жатканын да кошумчалайт. "Ооганстанда согушчандардын топтору жана курал-жарак катылган кампа бар. Ал эми Кыргызстанда 200-250 адамдан турган согушчан 2 топ Ноокат жана Чоң Алай райондорунда жайгашкан. Аларды Ош шаарынын мэри Мелис Мырзакматов жана Бакиевдердин үй-бүлөсү каржылайт. Алар адегенде 18-июлда Ош жана Ноокат шаарларын басып алышат, ага удаа түндүктө баш аламандык башталат. 25-июлда Курманбек Бакиев Ошко учуп келип, Кыргызстанды басып алгандыгын жар салат",- деди Мадмаров.
Оштун мэри Мелис мырзанын бул кепке эмнеге кошулуп калганы түшүнүксүз. Анткени Мырзакматовдун азыркы кадыр-баркы Бакиевдин учурундагы кезге караганда кыйла жогору эмеспи. Логикага сыйбачудай.
Мадмаров атайын кызматтарга кайрылганын, бирок көпчүлүк укук коргоо кызматкерлери бийликти басып алуу иши менен байланышта экенин белгиледи.

ИНТЕРНЕТТЕН БИР ШИҢГИЛ
Аңгыча болбой “Эл уулдары” жаштар коомдук бирикмесинин мүчөсү Жумамидин Сулайманкулов өзүнүн интернет баракчасы аркылуу билдирүү жасады. Бул активисттин баамында, Ош, Жалал-Абад, Баткен аймактарында Бакиевдин кадыр-баркы дагы деле бир топ жогору экен.
“Бакиевдин акталышын күткөн адамдардын саны да көп. Азыркылар анын кадыр-баркынын чаңында эле калышат. Элдин оозунан азыркы бийликти мактаган бир да адамды көрбөйсүң, баары нааразы” деп түш жоруган.

КАЙДАН КЕЛГЕН КАБАР?
Көпчүлүк “кантип эле ушундай болсун?” деп турганы менен, бул маалыматтын чоо-жайын УКМК баш болуп, тийиштүү органдар иликтеп чыкканы туура болчудай. Кээде ушинтип имиш-имиш болуп барып эле чынга айланып, анан түштөн кийин “мен айткам, мага аян берген болчу” деп чыкчу элек. Эгерде маалымат чындыктан алыс болуп чыкса, муну коомчулукка жар салып дүрбөлөң чыгарган адамдар тийиштүү жазасын алышы керек го.