Буга чейин гезитибизге Орусияда кыргыз кыздарын токойго алпарып жылаңачтап чечинтип, сабап, видеого тартып кордоп жаткан “Патриоттор” тобу тууралуу жазганбыз. Интернетке кыздарды коркутуп-үркүтүп жаткан видеолорду ким таратканын аныктоо үчүн Кыргызстандын да, Орусиянын да тиешелүү органдары ишти колго алышкан.

“МАГА АКЧА ТӨЛӨБӨСӨҢ, СЕНИ САПАРГҮЛДӨЙ КЫЛЫП ИНТЕРНЕТКЕ ЖАЯМ”
“Орусиядагы кыргыз кыздары башка улуттун өкүлдөрүнө көз кыспай, жөн жүрүшсүн” деп өздөрүн “Патриоттор” атап алган “тарбиячы” топ тууралуу сөздөр коомдо басаңдай элек. Бул иштин үстүнөн тартипти көзөмөлдөө кызматкерлери иштеп жатышат. Учурда Москва шаарында кыздарга кордук көрсөткөн балдар кармалышса, айрымдары жөн гана кечирим сурап, эркиндикте жүрүшөт. Кордукка алгачкылардан болуп учураган кыз-келиндердин бири – Сапаргүл.
Москвадагы мигрант кыз-келиндер менен иштешкен "Аруужан" фондунун жетекчиси Урмат Байматованын айтымында, бүгүнкү күндө Екатеринбург шаарында Сапаргүл жазган арыздын негизинде бир адам колго түштү. Дагы бир адам кармалып, анын кылмышкер экендиги аныкталбай, суракка алынган эмес.
Мындан сырткары кылмышка шектелип жаткан айрым балдардын Кыргызстанга качып кетишкени маалым болду. Ошондой эле Урмат Байматова өз маегинде Орусияда кыздарды коркутуу кеңири жайылганын белгилейт. “Метродон кыздарды аңдып, телефондорун алып, анан “менин телефонума акча салбасаң, сени Сапаргүлдөй кылып интернетке жаям” деп коркутушат экен”,- дейт Урмат Байматова.

“СОТКО ЖЕТКИРБЕЙ, КЫРГЫЗЧА ЧЕЧИШИП АЛСА БОЛОТ”
Интернет желелерине мын­дай көрүнүштөгү ви­део­­лор байма-бай тарап баштаганда Орусияда “Кыргыз ынтымагы” деген уюм пайда болот. Уюмдун мүчөлөрүнүн айтымында, алар Орусиянын 15 шаарын кыдырып, кыздарды кордогон “патриот” эргулдарды өз аракеттери менен таап келишкен. Кызыгы, “Кыргыз ынты­магы” уюму бул иштерди тартип коргоо органдарына жеткирбейт. Кыздарды зордуктап кеткендерди кайра ошол кыздарга үйлөндүрүшөт. Азырынча бул уюмду ким түптөп, ким каржылаары белги­сиз. “Эми милицияга арыз жазып, аларды каматып жибергенде эмне пайда? Өзүбүз кетирген кемчиликтерди кыргызча эле чечишсек болот да”,- дешет уюмдун мүчөлөрү.