Сахна адамдарынын боюнун узундугун жана салмагын сурап чыкканыбызда төмөнкүдөй жоопторду алдык. Бирок ал жооптордун 100 пайызга так жана туура экенине биз кепилдик бере албайбыз. Боюнун кыскалыгын, салмагынын аздыгын же ашыкчалыгын бурмалап жашыргандар болсо, алардын өз эркинде калды.

ИСА
"Ай, эжеке..." деп ырдаган кичинекей Иса Өмүркулов азыр 80 килограмм салмактагы жигит болуп чоңойгон. Бою – 184 сантиметр. Ананчы?! Бир жагынан Асыл эжеси бапестеп, экинчи жагынан апасы ар бир кадамын көзөмөлгө алып бөпөлөп турушса, Иса чоңойбогондо ким чоңоёт? Эжекелерине тийишип ырдаган Иса эми "Сүйүү жазына" мас болуп, жыргал жашоо дал ушул жигитке жарашып тургандай.

САЙКАЛ САДЫБАКАСОВА
Сайкал Садыбакасова кичинесинен эле томпойгон кыз экенин билебиз. Топтогу Айжамал, Гүлнара, Кенже өңдүү эжекелери бирден шоколад алып берсе эле канча калория... Ошентип отуруп убагында салмагы жагынан 70ке чыгып кеткен ырчы кыз "диета кармап жүрүп 55ке түштүм" дейт.Анан да "болду, эми өмүр бою ушул салмакты сактайм" деп өзүнө сөз берип отурган чагы. Бой жагына келсек, Кудайга шүгүр, 170 сантиметр.

АСКАТ МУСАБЕКОВ
"Аруузатым" деген ыры жакшы багып жатабы же дайыма жанында жүргөн жубайы, кыл кыякчы Залина басса-турса жолдошунун курсагын ойлоп турабы, айтор, Асакебиз 90 килограммды чапчып, көзгө толор салмагы болгону менен, ырчы өзүн анчалык толукмун деп эсептебейт. Анткен менен "сахна адамы болгондон кийин бир аз арыкташ керек го деп, көп жумуш кылып жатам" дейт ырчы. Бою болсо 179 сантиметр.

АЙБЕК ЗАМИРБЕК уулу
Шоу-бизнестеги дагы бир кыздардын көзүн күйгүзгөн мырза – Айбек Замирбек уулу. Айбектин бою 187 сантиметр болгону менен, салмагы 75 эле килограмм. Шоу чөйрөдөгү Арсен, Омар сыяктуу досторунан Айбекке майлуу орун тийбей жатабы, ким билет?.. Же зыңкыйып көп кыздардын көңүлүн буруунун аракетиби? Айтор, бой деген бар жана ал чын эле далай көздү күйгүзөт. Ага салмак дагы кошуп койсо, андан да көп көздү сүйдүрсө керек эле.

НУРЛАН НАСИП
Нурлан Насип ар кимди эркелетип жүрө берип, кайра жооп ала албай арыктап кеткен окшойт. Же продюсери Канат Кадыржандын мээрими эки баланы эркелетүүгө жетпей жатабы? Анча-мынча кыздардын салмагы деле 58 килограммдан ашат да. Же Канат түшкөн пайданы бөлүштүрүүдөн бир аз калыстыкты кармабай жатабы? Айтор, 171 сантиметрлик бойго салмагы жарашса сонун болмок.

РОЗА ШАКИРОВА
Роза эжебиз үнү жагынан да, салмагы жагынан да сахнадагылардын салмактуусуна кирет десек болчудай. Бою 164 сантиметр болгонуна карабастан, салмагы 68 килограмм экен. Эжекебиз кээ бир ырчылардай болуп сахнада деле көп ары-бери чуркабайт, бийлебейт дагы. Ананчы, баласын жыттап, жолдошуна эркелеген бакыт кимге гана жакпасын?! Бирок боюна дал келүү үчүн баары бир арыктоо керектигин ырчы өзү да билсе керек.

ДОБР
Спорт менен машыгып, өзүн чымыр денелүү алып жүрүүгө аракеттенген Добрдун салмагы мурда 85 килограмм болчу. Үй-бүлөлүк маселелер жаш жигитти жүдөтүп жиберген окшойт, азыр арыктап, 78 килограмм болуп калыптыр. Антсе да 169 сантиметрлик боюна салмагы бир аз ашыктык кыларын билип, арыктоо үчүн өзү да машыгууларын улантууда.

ЧОЛПОНАЙ
Бир карап "ырчылык жашоонун жарашкандыгынын белгисиби же Чолпонай башкаларга окшоп тамак тандап, диетага отурбайбы?" дейсиң. Бирок ырчыны узун бойлуу, суйкайган сулуу дегендер да бар. Анткен менен "ар кимдин табити ар башка" демекчи, “Чопа бир аз гана формасын сактаса...” деген мырзаларды да угуп калабыз. Чолпондун айтымында, бою 164 сантиметр, салмагы 53 килограмм экен.

АТАЙ
Сакадай бою менен килейген ийгиликтерди жаратып жаткан Атайды бул ирет сөз кылбай койсок болбос. «Шайтандын чоңунан эмес, кичинесинен корк» дечү беле? Оригиналдуу бийи менен кыргыздын атын далайга таанытып, өзү да атактуулукту багынтты. Ооба, бийлеш үчүн арык болуу ыңгайлуу. Бирок атакка балкыган күн келгенде да Атай жыргатып толбоду. Мейли, кантсе да Атайыбыз 169 сантиметр бою жана 60 килограмм салмагы менен арабызда аман болсун!

НЕЛЯ
Албетте, бала төрөө, бирди эмес, экини төрөө көпчүлүк айымдардын келбетине өзгөрүү алып келет. Чимириле бийлеп, ийиле ырдаган Неля бир кезде 50 килограммдык салмакта болсо, азыр эки наристенин апасы боло туруп 55 килограммга жеткенин айтат. Бою – 168 сантиметр. Мурда мырзалардын көзүн күйгүзө сахнада чыгыш бийин бийлеген Неля азыр андай өнөрү менен күйөрмандарын суктандыра албай калды көрүнөт. Анткени, өзүңүз баамдагандай, фигура андай нерсеге жооп бербей калган.

МИРЛАН БАЕКОВ
«Продюсер жок кыйын турбайбы» деп катуу ойлонуп жүргөн Мирлан Баеков 169 сантиметр бою менен 62 килограмм салмакты көтөрүп жүрөт. Бул ырчы мен тааныгандан бери эле ушундай калыпта. Үйлөнгөнүн укканда эми бир аз салмак кошот го дегем, бирок күткөнүмдөй болбоду. Ошол эле бойдон. Же Созул жеңебиз жапалдаш Мирландын курсагын жакшы тойгуза албай жатабы?

ЗАРИ
Зари келбетин сактайм деп берилип кетип, ашырып сактап алган окшобойбу. Көпчүлүк айткандай, же муну "породага" шылтайбызбы? Билбейм, айтор, ырчынын салмагы көз тоёрлук эмес. Бою 175 сантиметр болсо, салмагы – 54 килограмм. Бойду го Кудай аябай берген экен, бирок салмакка бир аз көңүл бурсак, баары жарашып калчудай. Үй-бүлөлүк жашоо көпчүлүк адамдарды өзгөрүүгө алып келчү эле. Күтө туралы, балким, Зари да толор.

АРМАН
Ырчы Арманды да арык мырзалардын катарына коштук, себеби ырчынын 177 сантиметр боюна 70 килограммдык салмагы бар. Сырттан караганда өтө арык көрүнөт десем, көпчүлүк мага кошулса керек. Ырчынын бир аз толуп, боюна салмагы жарашкан мырзалардын катарына кошулушуна тамакты даамдуу бышырган келинчек гана жетишпей жаткан өңдүү. Өзүңө жар тандоодо ушул жагына көңүл бөлүшүң керек экен, Арман.

Перизат Музуратбекова
star@super.kg