Туулган жылы, күнү – 1994-жыл, 17-май
Бою – 169 см
Салмагы – 48 кг
Параметри – 86-59-92
Учурда – студент

– Алтынай, моделдиктин эмнесин жактырып, бул кесипти аркалап келесиң?
– Сыналгыдагы моделдердин басканын карап, аларды туурап басуу жоругум кичине кезимден эле бар болчу. Кийин чоңойгондо бул тармакка жол издей баштадым. “Боюң жетпейт” десе деле кайра барып жатып, акыры кабыл алышты. Негизи, мен өзүмө ишенем. Кастингдерде керек болсо бою 180 сантиметр болгон кыздардын жанына туруп алсам да, көбүнчө мени тандашат. Негизи, модель катары иштеп жатканым менен, журналисттик кесипке окуп жатам. Модель катары 30га чыккандан кийин эч кимге керегим жок болуп калат да. А журналисттик кесип түбөлүктүү.

– Биздин өлкөдө модель болуп өзүңдү багууга мүмкүнбү?
– Атам “кызым, мен силер үчүн жашап жатам. Эмне керек болсо сурай бергиле, таап берем” деп калат. Бирок мен өзүмдү өзүм камсыздап калдым. Иш жакшы болгондо 20 миң сомго чейин табам. Өзүмө жетет.

– Дүйнөлүк практикада моделдердин атаандаштыгы абдан күч. Бизде кандай?
– Бизде деле ошол. Негизинен, мушташып кетпегени менен, кыздар арасында урушуулар абдан көп. Тилдери узун. Өч алуу деген бар. Мисалы, быйыл эле “Бишкек сулуусу” сынагына катыштым. Улуттук оймо-чиймелер түшүрүлгөн көйнөк даярдагам. Чыгар алдында анын белдигин таппай калдым. А көйнөк белдиги жок жөн эле этеги кенен көйнөк болуп калат. Акыры сахнага чыгып баратып бир актёрдун бут кийиминин боосун чечип, белиме байлап алып чыктым. Кайра келсем дивандын үстүндө турат. Ким алганы белгисиз. Андай учурларда мен да бирөөнү уят кылып өчүмдү алгым келет. Бирок андай жолго бара элекмин. Моделдик агенттикте эки жыл иштеп калган кыздарды “кобра” деп коюшат. “Кобра” статусуна жеткендер кыйын да (күлүп). Башында мен деле жапа чегип калгам. Көргөзмөлөргө сунуш түшүп турса деле, “бүгүн болбой калды” деп чалышчу. Ошон үчүн баары менен жакшы мамиледе болуш керек.

– Сен да “кобрасыңбы” анан?
– Менин деле иштегениме эки жыл болуп калды. Ошондой го. Негизи, моделдер "А", "В", "С" деген категорияларга бөлүнөт. "А" – эң жогоркусу. Мен дагы жакында эле бул бийиктикти багынттым.

– Бикини менен подиумга чыга бересиңби?
– Жок, чыкпайм. Бир жолу чыгып көргөм. Ал меники эмес экен. Жан дүйнөм да жол бербейт.

– Сулуу болуунун оорчулугу көппү же жеңилдигиби?
– Сулуу болсоң, баш оору көп. 18 жашка чыксам да, көптөгөн көрө албастыктарга дуушар болдум. Бирок өзүмдүн күчүм менен баарын жеңип келем.

– Кандай жигиттер жагат?
– Мага жөнөкөй жигиттер жагат. Ырчы, таанымал дегендер жакпайт. Себеби мен өтө кызганчаакмын. Нурлан Насип менен анын "Эркелетсемби?" деген ырынын клибине тартылгандан кийин тааныш болуп калгам. Дос катары жакшы сүйлөшөм. Бир ирет “аялың үйлөнгөндөн кийин ырчылыкты ташта десе, таштайт белең?” деп сурасам, “жок” деди. Андайлар мага жакпайт.

Чолпон Сүйүнбаева
star@super.kg