Жапжаш кыз аңгинин курмандыгы болду. Жакында Ысык-Көл облусунда жакаңды карматкан окуя катталды. Үй-бүлөлүү, эки баланын атасы болгон жигит кызды зордуктаганга аракет кылып, аягы өлүм менен аяктаптыр.

ДАЛИЛ БУЮМ – КАН БОЛГОН КИЙИМ
Тергөөнүн версиясы боюнча окуя төмөнкүдөй болгон. 31-июль күнү саат 17 чамасында Ысык-Көл РИИБинин нөөмөт бөлүмүнө Чолпон-Ата шаарынын Бижай кичирайонундагы алма бакта бир кыздын жансыз денеси табылганы тууралуу маалымат түшкөн. Окуя болгон жерге келген сотмедэксперттер кыз башына катуу тийген соккудан каза болгондугун аныкташат. Кылмыш болгон жердин айлана-тегерегин иликтеп жүргөн милиция кызматкерлери алыс эмес жерден Мерседес үлгүсүндөгү жүк ташуучу кичиавтобусту табышат. Кичиавтобустун ичин текшергенде кандын издери бар болуп чыгат.
Каза болгон кыздын өздүгү тез эле аныкталды. Ал 1992-жылы төрөлгөн Ош облусундагы Кара-Кулжа районуна караштуу айылдардын биринин тургуну Күмүшай (тергөө жүрүп жаткандыгына байланыштуу каармандардын аты-жөнү өзгөртүлдү) экендиги билинет. Күмүшай жайкы убакта Чолпон-Ата шаарында жайгашкан туристтик компаниялардын биринин башкы менеджеринин жардамчысы болуп иштеп жүргөн. Негизги далил катары эсептелген кылмыш болгон жерден табылган кичиавтобусту илинчек кылган оперкызматкерлер бир нече сааттан кийин шектүү деп эсептелген кичиавтобустун айдоочусунун изине чыгышат. Ал 1986-жылы Нарын облусунда төрөлүп, учурда Чолпон-Ата шаарында жашаган Касымбек деген жигит болуп чыккан. Касымбек сыра чыгаруучу ишканалардын биринде сыра таркатуучу болуп иштечү экен. Бирок ал өзүнөн шекти алыстатуу максатында милицияга келип, Мерседес үлгүсүндөгү жүк ташуучу кичиавтобусун белгисиз бирөөлөр уурдап кетти деп арыз менен кайрылганга жетишкен. Аны менен сүйлөшкөн оперкызматкерлер анын бир нерсени жашырып жатканын сезишет. Касымбектин үйүнө тинтүү иштерин жүргүзгөн учурда кан болгон кийимдер табылган. Көрсө, ал үйүнө барып кан болгон кийимдерин чечип, жашырып койгон экен. Алгач танып жаткан ал далил буюмдар табылган соң кылмышын мойнуна алууга аргасыз болду.

АЛГАЧ ПЛЯЖ, КИЙИН АЛМА БАК
30-июлдан 31-июлга караган түнү Касымбек дүкөндөргө сыра жеткирип жүргөн. Таңкы беш жарымдарда жумушун аяктап, үйүнө автоунаасын айдап баратып, күйүүчү май куюучу жайга жакын жерде турган кызды көрүп калат. Ичиндеги “жинди суу” ойноп кеткенби, айтор, сулуу кызга жакындаштын максаты менен ага үйүнө жеткирип коюуну сунуштайт. Күмүшай Касымбектин сунушуна көнбөй койгондо ал кызды автоунаасына күчтөп сүйрөп салып, көл тарапты көздөй айдап жөнөйт. Көл жээгине барып кийимдерин жыртып, зордуктаганга аракет кылат. Айласы кеткен кыз жардамга чакырып кыйкырып кирет. Кыздын жардам сурап чакырган кыйкырыгы тегеректе жүргөн адамдардын көңүлүн бурушу мүмкүн деп коркуп кетип, Касымбек курмандыгын муунтуп кирет. Карылуу жигитке алынын жетишинче каршылык кылса да назик кыздын күчү жетмек беле, кыз эсин тез эле жоготот. Тынчып калбаган Касымбек автоунаасын от алдырып, шаардын четинде тоо тараптагы алма бакты көздөй айдап барат. Бактын ичине автоунаасын токтотуп коюп, автоунаанын ичинде эле кызды кайра зордуктаганга аракет кылат. Ошол убакта эсине келе калган Күмүшай кайрадан каршылык көрсөтүп кирет. Касымбек алсыз кызды автоунаадан сүйрөп түшүп, жерге жатып калган кыздын башын колуна тийген таш менен чапкылап кирет. Кыз дем албай калганда гана колундагы ташты ыргытып жиберип, кетип калган.

Ысык-Көл РИИБинин тергөө бөлүмүнүн башчысы Айткул Жумагазиев төмөнкүлөрдү билдирди:

– Бул оор кылмышка шектелип 1986-жылы Нарын облусунда төрөлгөн К.Т. аттуу жаран кармалып, толугу менен кылмышын мойнуна алган. Анын үстүнөн Ысык-Көл райондук ИИБинин тергөө бөлүмү тарабынан Кылмыш жана жаза кодексинин 97-беренеси (киши өлтүрүү) менен кылмыш иши козголгон. Учурда ал РИИБдин убактылуу кармоочу жайына киргизилип, тергөө иштери жүрүп жатат.
Бул жорукка “жинди суу” күнөөлүүбү же адамдардын айбандыкынан айырмаланбай калган аң-сезими күнөөлүүбү? Адамдын эрки жоктугунан, өзүн кармай албагандыгынан бир ата-эне чырактай кызынан айрылса, эки кичине бала атасынан тирүүлөй ажырай турган болду.

Нурбек Абдыкадыров
koom@super.kg