– Кандай, Айзат? Сени көрбөгөнүмө көп болуп калды. Аябай өзгөрүп кетиптирсиң...
– Бир күнү эртең менен туруп эле стилимди өзгөрткүм келди. Балким, жаңы жашоого аттанганы турганымданбы же чоңойгонумдун белгисиби, айтор, сиз көрүп тургандай, өзгөрүп алдым. Курбуларым “бул стилиң менен улуу көрүнүп калат экенсиң, мурдагы эле Айзатты кайтарчы” деп жатышат. Бирок өзүмө азыркы Айзат жакты.

– Жаңы жашоо дегениңе түшүнбөй калдым...
– Быйыл колума дипломумду алгандан кийин магистратураны Германиядан улантууга мүмкүнчүлүк түзүлдү. Эки жылга Германияга кетип жатам. Билет да алып койдум.

– Ырчылыкты токтотосуңбу?
– Ырчылыкты токтоткум келбейт. Германиядан деле ыр жаздырып турам деп жатам. Бирок ал жакта жашоо кандай болот, ким билет? Бирок кеткиче бир ыр жаздырып, угармандарга таштап кетейин деп чуркап жүрөм.

– Продюсериң менен иштешпей калганыңды уктук.Өзүң чуркаган оор болсо керек?
– Ооба, продюсеримден кеттим. Себеби Тынчтыкбек Кожобеков шоу чөйрөдөгү кызматын жыйыштырбадыбы. Аны менен иштешпей калганда мен да шоудон четтей түштүм, эмне кыларымды билбей. Чынында, мурда "ырды кайдан алып, кантип жаздырам?" деген нерселерге башым ооручу эмес. Ушуларды эптей албай да жүрбөдүмбү.

– Байкашымча, сен шоу-бизнесте өзүнчө эле жүрө бергендердин катарындасың...
– Аны жашырбайм. Чынында, мен жалгыз жүргөндү жакшы көрөм. Шоу-бизнестегилер менен саламым түз болгону менен, апамдан башка адамдарга ишенбейм. Апама деле ичимде болгон нерселердин баарын төгүп-чачпайм. Көп сырым ичимде калат.

– Көпчүлүк ырчылар окууну сырттан окуп, чыгармачылыкты биринчи планга чыгарышат го. Сен андайлардан эмес окшойсуң?
– Мен өмүр бою эле окуйт окшойм. Албетте, муну менен ырчылыкты экинчи планга жылдырам дебейм.

– "Буга чейин жигит менен сүйлөшкөн эмесмин" деп келесиң. Немис улутундагы жигиттерден чабам деп жүргөнсүң го...
– Жигиттер менен сүйлөшүп калсам эле, “сен кичинекей кыздайсың, мүнөзүң да башкача” дей беришет. Балким, ошондон улам ушуга чейин жүрөгүмдүн ээсин таба элек болсом керек. Бирок немис жигитине турмушка чыгам деген планым жок. Кыргыздын эле жигити буюрса экен дейм.

star@super.kg