Таланттуу актриса, ырчы, бийчи, мээримдүү эне жана жөн гана кыргыздын сулуу айымы Асема менен көл жээкте эс алуу учурунда жолугуп калдым. Ал-акыбал сурашып, сырдаша да кеттик.

– Кандай, Асема, эс алуу көңүлдөгүдөй болуп жатабы?
– Баары жакшы. Керемет көлдүн жээгинде отургандын өзү эле башыңдагы бардык сур булуттарды алыска айдап салат эмеспи. Көлгө, негизи, иш сапары менен жолдошум экөөбүз келгенбиз. Анан биротоло 2-3 күн эс алып кетүүнү чечип, учурда күнгө кактанып жүргөн кезим.

– Иш сапары менен келсең, эмчектеги кызыңды кимге калтырдың же фигурам бузулат деп эмизбей калдың беле?
– Фигурам бузулат деп чоёңдогон айымдардан эмесмин. Мен үчүн баламдын ден соолугу биринчи орунда. Тун уулум Адаханды төрөгөндөн кийин 74 килограммга чейин толуп кеткем. Анан бат эле кайра калыбыма келгем. Баланы эмчектен эрте чыгарсаң эле фигурная болуп калбайсың да. Ал үчүн атайылап машыгып, эгер машыгууга шарт жок болсо, үй иштерин тытып жасасаң өз ордуңа келесиң. Мен кызымды 4 айдан кийин эмизбей калганымдын себептери бар. Төрөттөн кийин аябай катуу оорудум. Ар кандай дары-дармектерди ичкендиктен, айла жок кызымды эмизбей калдым. Ушул оорунун айынан, анан дагы бир себептерден арыктап да кеткем, азыр спорт менен машыгып өзүмө келүүгө далалат кылып жатам.

– «Башка бир себептерден улам» деп калдың. Бул суроону бербесем да болбойт. «Асема жолдошу менен ажырашып, эки жакта жашап жатышыптыр» деген сөздөрдүн канчалык деңгээлде чындыгы бар?
– Ар бир үй-бүлөдө уруш-талаш болот, казан-аяк кагышат дегендей. Урушпай жашаган үй-бүлөнү көрө элекмин. Эми менин атым элге таанылып калгандан кийин, албетте, ар бир кадамымды канча жашырып-жапсаң да билинип калат. Биздин үй-бүлөдө да жагымсыз окуялар болуп кетти. Акжол экөөбүздүн таарынышып кеткенибиз чын. Көп убакыт өтпөй эле кайра элдешкенбиз. Чынында, мен жашоомдогу аябай эле кооптуу көпүрөнү басып өттүм. Мындан кийин сырларымды эч кимге айтпас болдум окшойт.

– Эмнеге?
– Көп нерсеге мен өзүм күнөөлүү экенмин. Негизи, жашырып койчу нерселерди ачык айтып салмай адатым бар. Эгер мага бирдеме деп айтылса, эч качан жообун берчү эмесмин. Эми баары башкача болот. Мен өзүмдү өзгөртөйүн деп жатам. Өзүмө гана ишенип калдым.

– «Мындан кийин өзүмө гана ишенем, өзгөрүлөм» деп айтканыңа караганда жолдошуңа болгон таарынычың таркай элек окшойт?..
– Аялзаты кечиримдүү келишет. Анан кулакка жагымдуу сөз айтылып, кечирим сурап жатса, көк беттенип отуруп алган айымдар аз болсо керек. Мен ошол көпчүлүктүн катарына кирем. Мынакей, жолдошумдун таарынычымды таркатууга берген белеги (колундагы бриллиант көздүү шакекти көрсөтүп).

– Күнөө жолдошуң тарапта окшойт анда?
– Биздин уруш-талашка эч кимди күнөөлөй албайм. Бул ишти биздин үй-бүлөнү көрө албагандар да кылышы мүмкүн. Ошол эле жакын достордун арасында таарынышып жүргөнүбүздү билип туруп билмексенге салып, конокко чакырып сынагандар да болду. Билбейм, эмнеси болсо да эки балабыздын бактысын ойлоп, толук кандуу үй-бүлөнү сактап калуу экөөбүздүн гана колубузда деп чечтик. Айтып коюшат го, «ар ким өз жашоосуна сүрөтчү» деп. Анысы кандай жашообуздун рулу өзүбүздө гана экен.

– «Эч кимге күнөө койбойм» дейсиң. Балким, сенин да жолдошуңа болгон одоно мамилелериң болгондур... Дегеним, кээ бир айымдар төрөттөн кийин стресске кабылат эмеспи...
– Мен минттим, анан ал антти деп окуяны ийне-жибине чейин айтуунун кажети жок. Ошол сөздөрдү эстегим да келбейт. Болгону, жаш үй-бүлөлөргө, деги эле бактылуу жашап жаткандарга бир сөздү айтарда ойлонуп туруп айтышса дейт элем. Айтылган сөз атылган октой эле тиет тура.

– Сен тууралуу сөз болуп калса, «Асема жолдошун аябай басынтат, күн көргөзбөйт болуш керек» деп калышат. Чын эле ошондойсуңбу?
– Эми муну жолдошум же жакын адамдарым жакшы билишсе керек. Мен эч качан бой көтөрүп, өзүмдү бийик сезбейм. Адамдар менен да оңой эле тил табышып кетем. Албетте, адам болгондон кийин менде деле «характер» бар. Кээде бирөөгө ишенип бир ишти тапшырсаң жасабай койсо, ачуум келип тап берип, катуу урушуп салышым мүмкүн. Дагы бир нерсени айта кетейин, эгер жеңил ойлуу болсом, балким, акчасына карап күйөөгө тийип алмакмын.

– «Акчасына карап» дегениң кандай?
– Азыр жашоо ушундай болуп жатпайбы. Көп эле кыздар акчасына карап турмушка чыгышат. Эмне, калппы? Бул чындык. Экинчи аял болуп деле жашагандар толтура. А мен сүйүү үчүн эч нерсеге караган эмесмин.

– Жашооңдо бир чоң сыноодон өтүптүрсүң. Эми кел, алдыга койгон пландарыңдан бөлүшпөйсүңбү?
– Баягы эле чыгармачылык менен алек болуп жүрөм. Бир айдан бери «Санжыра» радиосунда «Жүрөк сырлары» деген берүүнү алып барып жатам. Жакында эле казактар «Жалбырактардын шуулдашы» деген тасмага тартылууга чакырышты. Жакшы эле баргам, бирок тартуучу топ менен жылдызыбыз келишпей койду.
Эл мени Асема эмес, «Боз салкын» деп таанышат эмеспи. Ошол деңгээлдеги дагы бир эл оозуна алына турган образ жаратсам деп жүрөм. Үч сценарий жазгам. Алдыңкы пландарымда таасирдүү, маанилүү, элге жакын кино тартууга камылга көрүп жүрөм. Жыйырма миң доллар менен баштаганы жаткам. Бирок тартыла турган тасманын көп окуялары Парижде боло тургандыктан, каражат жетчүдөй эмес. Эми аны да көрө жатарбыз.

– Шоу-бизнес өкүлдөрүнүн көбү эле өзүн дизайнер-модельер жаатында да сынап жатышат. «Асема бут кийим чыгарып жатыптыр» деп укканым бар...
– (Күлүп) Ий, мен бут кийим чыгарып жатканымды өзүм Замира Молдошевадан угуп жатпаймынбы. Бир күнү эле Замира эже телефон чалып, «Асема, сен эмне, улуттук колориттеги бут кийимдерди чыгарып жатасыңбы?» дейт. Ошол жерден оозум ачылып калыптыр. Кайсы бир эле адам «Асеманын бут кийимдери» деп соодасын жүргүзүп жатыптыр. Окурмандарга айта кетер элем, эгер ошол адамдан кокусунан бут кийим алып калсаңыздар, мага кабарлап коюңуздарчы. Негизи, мода жаатына салым кошсомбу деген ой менде деле бар. Буюрса, балдарга арналган сапаты мыкты кийим-кечектерди жаратсамбы деп жүрөм.

– Ошол ой-тилегиңе жет. Маегиңе рахмат.

Бахияна Сатылганова
star@super.kg