Суусамыр өрөөнүндө “Суусамыр жайыттары” ассоциациясынын өкүлдөрү чогулуп, бул аймакта малын жайгандардын маселесин талкууга алышты. Өрөөндө, негизинен, Чүй, Талас жана Жалал-Абад облусунун малы жайылат. Жыйында ассоциациянын иш­мер­дүүлүгү тууралуу маалымат уктурулуп, 2013-2015-жылдарга белгиленген стратегиялык план талкууланды. Ассоциациянын өкүлү Адыл Жумалиевдин айтымында, Суусамырда барган сайын инфраструктура жана ветеринария тармагында көйгөйлөр көбөйүүдө. Ал эми дагы бир өкүлдөрдүн бири Кумар Боромбаев быйылкы жылы ассоциацияга мүчө болуп киргендердин саны көбөйгөнүн, ага Суусамырда жүргөн торпоктун салмагы 60тан 350 килограммга чейин жогоруларын жар салышкандыгы себеп болгонун айтат. “Ушул эле көрсөткүч башка жайлоолордо, болгону, жүз килограммга чейин жетет”,- деди ал.
Маалымат үчүн: 2011-жылы июлда каттоодон өткөн “Суусамыр жайыттары” ассоциациясы 80 жайыт комитетинин 57син бириктирип турат. Суусамыр өрөөнү Кыргызстандагы эң чоң мал жайлаган борбор катары таанымал. Учурда 415 миң гектарга чукул өрөөндүн аймагында 1,5 миллионго жакын кой, уй, жылкылар багылат. Анын жүз миңден ашууну Суусамырдын кыштоосунда калышат.