Болот Шердин Өмүрбек Бабановго кайрылуусу
"САГА БИР ОК ЖӨНӨТӨМ, ЭКИНЧИСИ ӨЗҮМ ҮЧҮН..."

"Мародёр" атыктыргандыгы үчүн ЖК депутаты Болот Шер Өмүрбек Бабановго ок жөнөттү. Кадимки тапанчанын огун. Арга кеткенде ак жеринен жаманатты кылгандар менен ушундайча күрөшүүнү чечиптир, эл өкүлү. Өмүрбек Бабановдун жообу да көп күттүргөн жок.

Урматтуу Өмүрбек Токтогулович!
Сыйлагандыктан эмес, сыпайылыктан ушинтип атап жатам.
Мен, Шер Болот Эсентаевич, «Ата Мекен» социалисттик партиясынын мүчөсү болгонум менен, 2010-жылдан тарта ден соолугумдан улам саясаттан алыстай түшкөнүм ырас. Ал тургай депутаттык мандатымды таштайын деп лидерибиз Өмүрбек Текебаевге кайрылгам, бирок ал макул болбоду.
Эки революцияны тең жүрөгүм аркылуу өткөрдүм.
2005-жылдын мартын эстегенде ошол революциянын каармандарынын бири Баяман Эркинбаевдин кайгылуу өлүмү көз алдыма тартылат. Бакиевдер аны үч айдын ичинде революциянын баатырынан каракчыга айлантканы эске түшөт.
Ал эми сен мени революционерден мародёрго айлантыш үчүн 2 жыл 3 ай убакыт жумшапсың. Өзүңө таандык НТС телеканалы аркылуу сен мени үч күн бою каралап, элге каракчы-мародёр кылып көрсөттүң, элди ага ынандыргың келди. Мага каршы тапкан күбөң – бир нече жолу соттолгон кылмышкер, жадакалса өз атасы балалыктан кечкен, Кудайдан жөө качкан, азыр да кылган кылмышы үчүн түрмөдө отурган адам болдубу?
Ушунчалык пастыкка түшөрүңдү, ушундай жан кечтилер менен шериктеш экениңди эч ойлобопмун. Манастын арбагы айланган жерден мындай ыплас жан чыкпаш керек эле...
Эсиңдеби, 2010-жылдын 5-апрелинде, революция башталардан бир күн мурун, Таласта өтө турган курултайга жөнөгөнү камданып жатканымда азыркы Тышкы иштер министри Руслан Казакпаев менен келгениң? Эмнеге баратканымды айтып, сага «бизге жардам бер» дедим. Ошондо саясатты жыйыштырып салганыңды айтып, андай иштерге аралаштырбоону суранганыңды сен унуттуңбу?
Эми Таласка барып, Апрель баатырларына эстелик ачып жатасың. Буга сенин моралдык укугуң барбы?
Өмүрбек Токтогулович!
Суроолорума жооп берчи?
Мен ошондо Бишкекке кантип келгенимди сен билесиңби? 6-апрелден 7сине караган түнү колумду кишендеп, башыма мүшөк кийгизип, УКМКнын СИЗОсуна эки ашууну ашырып алып келишкен.
Сен билесиңби, ошол күнү азаматтарымдын канчасын жоготтум? УКМКнын СИЗОсунан чыгарып кетүүгө аракет кылган досум, милициянын полковниги Акжол Камбаров биринчи болуп каза тапты.
7-апрелде эмне кылганымды, ким менен болгонумду, эмнелерге каршы күрөшкөнүмдү сен билбейсиңби?
Инсульттан кийин түзүк сүйлөй албай жатсам да, кыргыз милициясын жыйнап, шаарды сактап калыш үчүн мародёрлорго каршы жоопкерчиликти жеке өзүмө алып, курал колдонууга буйрук бергенимди бүгүн эстегиң жокпу?
Сага жашыруун сырымды айтайын. Документке кол коюш үчүн Шерниязов деген фамилиямды Шер деп кыскарттым. Шерниязов деген фамилияны жазыштын өзү мага кыйын болчу ал кезде, калемди зорго кармап, фамилиямдын алгачкы үч тамгасын араң жазып кол койчумун.
7-апрель күнү Бакиевдердин мүшөгүн, Максим менен Жаныштардын көр дүйнөсүн кеңселеринен көтөрүп качкан мародёрлордун бирине айлантып койдуңбу мени? Сен мени 7-апрелде көрүнгөн үйдүн көр-жерин аңтарып, мүшөк ташып чуркап жүргөндөрдүн бири дедирттиң. Сен мени мародёр депсиң. Эгер мен жөнүндө чын эле ошондой ойдо болсоң, көзүмө тике кара!
Өмүрбек Токтогулович!
Сени ар дайым, кээде партиянын чечимдерине да карабай колдоп келгем. Жердеш катары да, иним катары да. Бирок саткындык сенин каныңда окшойт. Өз досторуңду кандай сатып жүрсөң, сен мени да так ошондой саттың. Мен эч качан креслого, депутаттык мандатка да, генералдык чинге да жабышпагам. Бирок акыйкаттыктан эч качан тайган эмесмин.
6-7-апрелдеги революциянын тарыхы эки ача эмес! Эгер 6-7-апрелдин тарыхын эми сен таянган кылмышкерлер жаза турган болсо, анда Бакиевдердин огунан баатырдык менен жан кыйгандардын арбагын мазактаган мындай азапка мен чыдабайм.
Сен саясий дымагыңдын курмандыгына айландың. Бул ирет сен, сенин досторуң туура эмес бутаны тандашыптыр. Ата-бабаларымдын жана балдарымдын ыйык ысымын сен да, сен жалдаган кылмышкерлер да булгай алышпайт. Сен сымал олигарх эмесмин. Сеникиндей телеканал, гезит, интернет-сайттарым жок.
«Жигитти намыс өлтүрөт» дейт кыргызда. Таластык эркектин ар-намысы, абийири кандай болорун мен сага түшүндүрөйүн. Абийир менен абийирсиздиктин арасы бир гана ок. Сен мага башка арга калтырбадың. Сага бир ок жөнөтөм, экинчисин өзүм үчүн алып калам.
Премьер-министр болуп туруп, сен түрмөдөгү үч мародёр-кылмышкердин билдирүүсүн иликтөө үчүн ведомстволор аралык комиссия түздүң. Анда мындай макулдашалы. Эгер «сенин» бул комиссияң менин мародёрлукка кенедей эле катыштыгым бар экенин далилдей алса, анда уятты жууп салуу үчүн мендеги окту өзүмө кадайм.
Эгер «сенин» комиссияң мародёрлукка катыштыгым жок экенин, муну сен мени жаманатты кылуу ниетинде гана жасаганыңды аныктаса, анда экинчи ок сеники. Өзүңө када! Жок дегенде балдарың Кыргызстанда жашап, Талас тарап аларга ачык болсун!

Болот Шер

Болот Шердин кайрылуусуна Өмүрбек Бабановдун жообу
«СИЗГЕ ЧЫҢ ДЕН СООЛУК КААЛАЙМ!»

Урматтуу Болот Эсентаевич!
Сиздин менин дарегиме жөнөткөн кайрылууңуз менен өтө кылдат таанышып чыктым. Биринчиден, сизди кайрадан көрүп жатканыма кубанычтамын. Ал эми кайрылууңуз тууралуу айта турган болсом, албетте, башка партиялаштарыңыз сыяктуу эле «Ата Мекенге» коюлуп жаткан күнөөлөрдү моюнга алуу кыйын болуп турат. Бирок айрым сиздин партиялаштарыңыздын талап-тоноочулукка катышы бар-жогун иликтөө иши аныктап, акыркы сөздү соттук териштирүүдө сот айтышы керек. Кылмыштын мындай түрүнө саясий билдирүү менен эмес, мыйзам чегинде жооп кайтаруу зарыл. Биздин коомдо кимдин ким экенине карабай кол тийбестик болбош керек. Сизге чын дилден ден соолук каалайм.

Урматым менен премьер-министрдин милдетин аткаруучу
Өмүрбек Бабанов