Кенедейинде чоң сахнанын босогосун аттап, Айчүрөк Иманалиеванын колдоосу менен ырдап чыккан Анжелика кыргыз элинин көз алдында чоңойду. Сулуу кызга суктангандар да, көз арткандар да көп болот эмеспи, андыктан бул ырчы кыздын жеке жашоосу дайыма көңүл чордонунда келе жатат. Алгач мектепти аяктай электе турмуш жолуна аттанганы кызуу талкуу жараткан. Азыр ал эки кыздын бактылуу энеси.
Чырайлуу ырчынын артынан ээрчиген кептер ал турмушка чыгып, эне болгонунда эле токтоп калган жок. Устаты Айчүрөк Иманалиева менен чырдашып, ал Чубактын чуусундай көпкө узарып, Анжеликанын үй-бүлөлүк тынчтыгына коркунуч жаралып, акыры “мен сахнаны эмес, үй-бүлөнү тандадым” деп бизге маек берип, ырчылыкты жыйыштырып салган болчу. Ошол маегинде
“күйөөм 5 маал намаз окуйт, мен да ниеттенип жатам” деген. Кийинчерээк уккан-көргөнүбүз боюнча чын эле намаз окуп, атүгүл узун көйнөк-жоолукчан жүрө баштаган.
Ал маектен көп өтпөдү. Үй-бүлөсүндөгү маселелер жай-жайына түштү белем, ырчы кыз сахнага кайтты. Өзгөчө бир ыр менен болбосо да, шоу-бизнес чөйрөсүндө активдешип, ар кандай кечелерге катышып, өзүн алпаруучу катары да сынап көрдү. Ал эми азыр Анжелика дин жолундагы айым эмес, чыгармачылык менен кошо бизнести да жакшы жолго койгон, аны менен катар шоу чөйрөдөгү ар кандай кечелердин көркүн ачкан “светская львица” десек жарашчудай. Өмүрүндөгү мындай өзгөрүүлөр эмнеден улам экенин сурап кайрылып талуу жерине тийдикпи, айтор,
“мен бирөөлөр үчүн намаз окубайм, окусам өзүм үчүн окуйм!” деп так секирди. “Намаз окубадың” деп бирөөнү бирөө айыптамак беле?.. Сыягы, ырчы бизди түшүнбөдү көрүнөт.