Ысык-Көл облусунда жумуш издегендердин саны күн санап көбөйүп барат. Жаштар, эмгек жана ишке орноштуруу бөлүмүнө Каракол шаары боюнча жарым жылда 2000ге жакын адам жумуш издеп кайрылышкан. Алардын ичинен атайын жумушсуз деген статусу барлардын саны 800гө жакын. Бул тууралуу Жаштар, эмгек жана ишке орноштуруу башкармалыгынын Ысык-Көл облустук бөлүмүнөн кабарлашты. Жакынкы аралыкта эле шаардагы эмгек рыногунун абалы жөнүндө мониторинг жүргүзүлгөн. Анда программист-администратор, жогорку квалификациядагы тигүүчүлөр, экскаваторчу, соода агенттери, слесарь-монтажчы, гид-экскурсовод кесиптери талап кылынып жатканы белгилүү болду. Ал эми быйыл жумушка орноштуруу жана жумушсуздардын санын азайтуу аталган министрликте күн тартибине бекем коюлган маселе.