Кеңсебиз Нарын шаарында ачылгандан бери эшигибиз тынбайт. Бул жолу аскерде кызмат өтөп жаткан жигиттин оор абалда ооруканага түшкөнү тууралуу кабар келди.

БЕТИНЕ ТҮТҮК ТҮШҮП КЕТТИ
Редакциябызга Орозобек Накинов аттуу мырза байланышып, Нарын шаардык ооруканасына аскер кызматын өтөп жаткан жигитти оор абалда алып келишкенин кабарлады. Кабарды уккандан кийин эле ооруканага жөнөп калдым. Жигиттин абалы чын эле оор, жандандыруу бөлүмүндө жаткан экен. Тилекке каршы, бизди киргизген жок. Дарыгер «башы аман калды, шүгүр дейли» деп жигиттин энесин жоошутуп жатыптыр. Апасы Гүлмира Акматованын абалы айтпаса да түшүнүктүү. Көз жашын көлдөткөн эне төмөндөгүлөргө токтолду:
– Менин 8 балам бар, төртүнчүм Кундузбек 1991-жылы туулган. 2011-жылдын ноябрь айынын онунда аскерге кеткен. Балама «барбай эле кой» десек болбой, «жигиттик милдетимди өтөшүм керек, барам» деп кетип калбадыбы. 22-сентябрь күнү түштөн кийин «балаңыздын үстүнө түтүк түшүп кетип, ооруканага келди, келгиле» деп аскер бөлүмүнөн телефон чалышты. Бирок акча-тыйын жок болгондуктан, эртеси келдим. Атасы да иштебейт, пенсияны карап отурабыз. Балдарымдан эң зиреги, тыңы жана мен үмүттөнгөн балам ушул эле.
Эртең менен келсем, уулумдун бети таанылбай калыптыр. Шишип кеткенде адам башкача болуп калат тура, тилин бери тарттырып коюшуптур. Менин баамымда, уулум сабалган өңдүү, бирок командири бетине түтүк түшүп кеткенин айтты. Тамак иче албай жатат. Кечинде барып шорпо ичирсем, кичине кашыктын жарымын эле ичти, оозунан кан куюлуп жатат. Баламдын келечегин эч ким ойлогон жок. Аскер кызматындагылар биз дарылатабыз деп жатышат. Жылдар өткөндөн кийин баламдын ден соолугу кандай болот? Жаак сөөгү сынып кеткендиктен, тилин бери тартып койгонбуз дешти. Өзү тилге келип эч нерсе деп айта элек.

«ЭЧ КАНДАЙ САБАЛГАН ЭМЕС, ЖӨН ГАНА КЫРСЫК»
Чырактай жигиттин абалын көрүп, «келечекте ден соолугуна ким жооп берет, чын эле кырсыкпы же сабалганбы?» деген ойлор жаралбай койбоду. Ушундан улам Нарын шаарынын 25-аскер бөлүмүнө кайрылганыбызда өзүн Аманат Темиров деп тааныштырган аскер бөлүмүнүн юристи:
– 2012-жылдын 22-сентябрь күнү саат 15:45 чамасында «Кынды» заставасында ЭЦВ 8 насосун орнотуп жатканда Турарбек уулу Кундузбектин бет жагына түтүк түшүп кетип жаракат алган. Ал бир айдан кийин кызматын өтөп бүтүп, үйүнө кетмек. Биз бардык каражатын мойнубузга алабыз, бекер дарыланат. Эч кандай сабалган эмес, жөн гана кырсык,- деп билдирди.
Балыкчы гарнизонунун аскер прокурору Максатбек Молдалиевге байланышканыбызда:
– Мен маалыматты 22-сентябрда алдым. Бул боюнча иликтеп жатабыз, төрт-беш күндүн ичинде жыйынтык чыгарабыз. Кызмат өтөп жаткан балдар ошол жумушту жасаш керек беле же жок беле? Чын эле түтүк түшкөнбү? Мына ушунун баарын изилдеп, тактап чыгабыз,- деп жооп берди.