Баланы кайсы спорт түрүнө берүү керек? Уулун же кызын компьютердик оюндардан оолактатуу үчүн, же анын саламаттыгы үчүн ушул суроого токтолбогон ата-эне аз болсо керек. А балким, анын арты менен баланы тыкандыкка, өз алдынчалыкка үйрөтүүнүн жолун издеп, ушул суроону өзүңүзгө бергендирсиз... Анда, бул чакан кеңеш сиз үчүн.

СПОРТ ИШМЕРИНЕН КЕҢЕШТЕР...
Cовет доорунан кийин «секционная работа» ишин токтотуп, мамлекет жаш балдарды эл ичинен издеп спортко тартпай калганы маалым. Азыр баланы спортко ата-эне өзү алып барчу заман.
Өлкөдө мамлекетке караштуу спорттук окутуу борборлору, федерациялар жана Билим берүү министрлигине караштуу спорттук жайлар балдарды бекер окутат. Мындай борборлор Бишкектен тышкары райондук борборлордо, шаарларда жана айрым айылдарда да бар. Ошондой эле көз карандысыз спорттук клубдарды да тапсаңыз болот.
Баланы спортко эрте берүү анын кызыгуусун, каалоосун өлтүрүп коюшу мүмкүн. Балдардын басымдуу бөлүгү 6-7 жашында даяр болуп, көңүл бөлүүгө жана оюн эрежелерин үйрөнүүгө жарап калышат.
Бала эмоционалдык жана физикалык жактан спорт менен машыгууга даяр болгондо гана бериңиз. Анын алдында балаңыздын кызыкчылыгын талдап чыгышыңыз керек болот. Ал кайсы бир спорттун түрү боюнча профессионал спортчу болобу же ден соолук үчүн гана машыгабы?
Көп тармактарды карап, талдап, тандап көрүңүз. 2-3 ирет машыгууга барганда эле улантууга болобу, жокпу, аңдоого болот. Анан да бул нерсе көп убакытты талап кыларын эске алыңыз.
Айрым балдар командалык спорт түрлөрүнө шыктуу келип, бирок жеке спорт түрүнө кызыгуусу жок болушу мүмкүн (же тескерисинче). Бул учурда машыктыруучунун кеңешин угуңуз. Тажрыйбага таянып, ал сиздин балаңыздын кайсы спортко шыктуу экенин айта алат.

Саралаев Марат Кадыкеевич,
педагогика илимдеринин кандидаты, Кыргыз мамлекеттик дене-тарбия жана спорт академиясынын окутуучусу:
– Эрте жаштан баланы экстремалдык жана чыгыш күрөшүнө жолотпой эле койгон оң. Анткени бул спорттун түрлөрү жаракат алуудан тышкары баланы психологиялык жактан бузуп коёт. Эң негизгиси, ата-эне алдын ала баланы кайсы спортко эмне максатта берип жатканын аңдап алууга тийиш. Бул жерде болочок спортчунун же спорт күйөрманынын кызыгуусу өтө маанилүү. Эгер баланын кызыкчылыгын эске албай туруп атасы же апасы кызыккан спортко барса, андан пайда чыкпайт.

ФУТБОЛ
Бишкекте ири спорттук клубдарда, атайын футболдук клубдардын алдындагы окутуу борборлорунда жана бардык региондордо жайгашкан футбол федерацияларында кабыл алынат.
Футболго сөөгү ката баштаган 6-7 жашында алынат. Клубдар жана жеке залдар айына 500-700 сомдон. Буттун жаракатын эске албаганда коркунуч жокко эсе.
Балаңыз чапчаң, физикалык жактан күчтүү жана ылдамдыгы жогору болууга тийиш. Көбүрөөк күч сарпталгандыктан, жүрөгү ооругандар үчүн жана кан басымы
төмөндөргө сунушталбайт.

БАСКЕТБОЛ
Бишкекте ири спорттук клубдарга, КРнын Баскетбол федерациясына кайрылсаңыз болот.
Сөөгү ката баштаган 6-7 жаштан алынат. Айына 400 сомдон өйдө.
Баланын бою, колдорунун узундугу жана булчуңдарынын кубаттуулугу каралат.

СУУДА СҮЗҮҮ
Көбүнчө Бишкекте актуалдуу. Машыгууга шартты КРнын Сууда сүзүү федерациясынан жана атайын бассейндерден табууга болот.
6-7 жаштан өйдө кабыл алынат.
Айына 600 сомдон жогору.
Колдордун кубаттуулугу, ыкчамдык мааниге ээ.

СПОРТТУК ГИМНАСТИКА
КРнын Спорттук гимнастика федерациясы, залдар.
4-6 жаштан өйдө алат.
Айына 700 сомдон жогору.
Буту-колдун чоюлчаактыгы эске алынат.

МУЗ ҮСТҮНДӨ БИЙЛӨӨ
КРнын Спорттук гимнастика федерациясы, залдар.
4-6 жаштан өйдө алат.
Айына 700 сомдон жогору.
Эң кооптуу спорт түрүнө кирет. Бир эле ашыкча кыймыл менен бутту чоюп, жамбаш сөөктөрдү, колду сындырып алуу мүмкүн.
Буту-колу ийкемдүү, чоюлчаак болушу шарт.