Өткөн аптада көптөн күткөн «Тамашоунун» 5-сезонунун ачылышы болуп өттү. Залдагы элди кыраан-каткыга бөлөгөн күндүн күнөөкөрлөрү өлкөдө болуп жаткан пикет-митингдерди ашкере тамашалаганын айта кетпесек болбостур. Анда 5-сезондун ачылышындагы тамашалардан бир шиңгил.

Акыркы учурда өлкөбүздө митинг, пикеттер көбөйүп, буга байланыштуу «митингология» факультети ачылды. «Митинг» латын тилинен «баш аламан» деп которулат. Бул сөз Кыргызстан боюнча Талас менен Бишкекте көп колдонулат. Мындай аталышта бизде тасма да тартылган. «Баш аламан-1» – 2005-жылы, «Баш аламан-2» – 2010-жылы, «Баш аламан-3», Кудай сактасын, эми үчүнчүсү тартылбай эле койсунчу!

(«Моника Беллуччи»)

Мугалим окуучудан:
– Курманбек Бакиев ким болгон?
– Мурунку президентибиз болгон.
– Анан?
– Байлар айдап жиберишкен.
– Кайсы байлар, сен эмне деп жатасың?
– Атам байлар, Отун байлар, Теке байлар.

(«No name»)