«Тамашоу» Лигасына Жа­лал-Абад облусунун намысын коргоп, «Жалал-Абад» курама командасы барып катышып келгенинен кабарыңар бар чыгар... 11-октябрь күнү «Жалал-Абад» командасы «Тамашоунун» 2-сезонунун ачылышын белгиледи. Бул Лиганы Абдыманап Дыйканов уюштуруп, ага жалпысынан 19 команда катышты. Облустун бардык бурчунан келген командалар ат салышуу менен бирге элге жагымдуу маанай тартуулашты.
7 адамдан турган калыстар тобу кеңешип, 19 команданын ичинен Барпы Алыкулов атындагы Маданият техникумунун атынан чыккан «Экөөбүз» командасын жеңүүчү деп тапты. Ал эми «Мыкты тамаша» наамына Токтогул районунан келген «No problem», Кочкор-Ата шаарынан келген «7 KG» командалары ээ болушту. «Мыкты оюнчу» наамына Жалал-Абад облустук медициналык колледжинин намысын коргогон «ЖАК» командасынын оюнчусу Жыпар Садыкова жана «SBK» командасынан Эрмек Абдыкерим уулу ээ болду. Жеңүүчүлөр дипломдор менен сыйланып, калыстык милдетти аркалоого чакырылган «Супер-Инфонун» Жалал-Абаддагы бөлүмү да өз тандоосун жасап, жеңүүчүлөргө белектерин берип кайтты.
Эскерте кетсек, «Жалал-Абад» курама командасы «Тамашоунун» 5-сезонунун ачылышына чакырылган эле. «Каражаттын тартыштыгынан улам команда ал оюнга катыша албай калды»,- деп кейийт команданын капитаны Абдыманап Дыйканов.

Гулжан Эшбаева
jalalabad@super.kg