Депутаттар Дамира Ниязалиева менен Ширин Айтматованын ортосундагы жаңжал кайрадан жанданды. Социал-демократ Ниязалиева 17-октябрда билдиргендей, «Фарм Трейд» ишканасы «ата мекенчи» Айтматованы сотко бермек болууда.
Буга чейин Ширин Айтматова «Ниязалиеваны ЖКнын Социалдык саясат комитетинин башчылыгынан түшүрүү керек» деген билдирүүсү менен чыккан. Ал Ниязалиеванын кызы Айгүл Токомбаева жетектеген «Фарм Трейд» ишканасынан мамлекеттик медициналык мекемелер акыркы эки айда эле
9 миллион сомдон ашык дары-дармек сатып алганын маалымдаган.
Дамира Ниязалиева: «Саламаттыкты сактоо министрлиги текшерип, тактады. Тендерлер калыс өткөрүлгөн. Аталган ишкана медициналык мекемелерге сатылган товардын 3,5 пайызын гана ээлейт. Комитеттин жетекчиси катары ишкананын кызыкчылыгын коргогонум боюнча маалымат калп»,- деди.
Бирок депутат айым ишкананын кызына тиешелүү экендиги боюнча маалыматты моюндаган да, төгүндөгөн да жок. Эми Ниязалиева комитет төрайымдыгын тапшырып береби же Айтматованын сөзүн калп деп далилдеп берер бекен?