Орусия, Казакстан жана Беларустун милиция ардагерлеринин уюму 2002-жылы түзүлүп, алар кызмат учурунда курман болгон милиция кызматкерлерин эскерип келишет. Бул жолу уюштуруучулар иш-чараны 20-октябрда Кочкор районунан башташты, себеби 2010-жылдагы Ош окуясында курман болгон А.Султанов так ушул райондун ИИБин эки жыл жетектеген эле.
Иш-чаранын максаты – кызмат учурунда курман болгон милиция кызматкерлерин эскерип, ички иштер ардагерлерин социалдык жактан коргоо, жаш кызматкерлерди патриоттуулукка үндөө жана алардын үй-бүлөлөрүн колдоо. Ата Мекени үчүн жан бергендердин элеси эч качан унутулбай, «Бул – жаштар үчүн дем-күч!» деген ураандар жаңырбай койгон жок. Автожүрүш министрликтин борбордук аппаратында да өткөрүлүп, андан ары Чүй облусунун Жайыл, Жалал-Абад облусунун Базар-Коргон жана Оштун Кара-Суу райондорун карай багыт алмакчы. Автожүрүштүн уюштуруучусу – алыскы Орусиядан келген «Намыс» коомдук бирикмеси.