Өткөн саныбызда ырчы Сайкал Садыбакасованын бир мырза менен кучакташып түшкөн сүрөттөрүн гезитибизге жарыяладык эле. Бул макала жарыкка чыгары менен окурмандардан «Сайкал менен турган жигит чынында эле Оштогу рэкеттердин бири. Бул баланын үй-бүлөсү бар, бул кайдагы сүрөттөр, ыя?» деген сыяктуу комментарийлер жаай баштады. Албетте, мындай кептерге биз да ишене алган жокпуз. Сайкал да буга унчукпай коё албады. Ал сүрөттөр туурасында жооп берди.

Жогоруда кеп болуп, талкуу жаратып жаткан сүрөттөрдүн гезит бетине жарыяланып калышы да жөн жеринен эмес. Сөз болуп жаткан сүрөттөр интернеттеги сайттарга жүктөлүп, кызуу талкуу башталганда ырчы кыз бизге байланышып, кимдир бирөөлөр көрө албастык кылып тасмага тартылган кадрлардан алып слайд жасап, интернетке жайып жибергенин айтып кейиген эле. Макала чыккан соң бул сүрөттөр эл арасында талкуу чордонуна айланып, кептин чоо-жайын кененирээк түшүндүрүп берүү үчүн САЙКАЛ САДЫБАКАСОВА редакциябызга кайрылды.

«АЛ ТҮП НУСКАСЫНДА ЭСТЕЛИК ҮЧҮН ТҮШКӨН СҮРӨТ ЭЛЕ»
– Эң биринчи айтарым, сүрөттөгү жигит менин жигитим эмес. Болгону, байкем катары көргөн жерден учурашып жүргөн жакшы таанышым. Интернетке жайылып кеткен слайд-шоудо колдонулган сүрөттөрдүн ичинен эң биринчиси гана реалдуу сүрөт. Бир жолу курбу кыздар менен сейилге чыгып жолугуп калганда эстелик үчүн деп сүрөткө түшкөнбүз. Жаныбызда башка кыздар бар болчу, негедир аларды кесип, белгисиз бирөөлөр Дүйшөн байке экөөбүздү калтырып, романтикалуу кылып монтаждап коюшуптур. Ал эми калган сүрөттөрдү менин «Братандар» деген тасмага тартылып жаткандагы фотосессияларымдан алып, болушунча Дүйшөн байкеге чаптап чыгышыптыр. Ал тасмада Айгерим экөөбүз мейманкананын бир бөлмөсүндө төшөккө жатып алып телефон аркылуу сүйлөшүп жаткан жерибиз чагылдырылган. Мына ошол төшөктө жаткан кадрлардан кошуп, тиги байке менен эс алып жаткан учурдан бир үзүмдөй кылып жасагандарына таң бердим. Өзүнчө эле романтика.
Алгач интернеттен сүрөттөрдү көргөндө төбө чачым тик турду. Ал слайд-шоуну ак-кара түстө жасашы деле бекеринен эмес да, азыркы заманбап сүрөттөр түстүү болот эмеспи. Эгер ал чыныгы сүрөт болсо, аны кайра ак-кара түскө өткөрүүнүн кажети бар беле? Балчайта эле берип салышмак да. Макул, мени каралагысы келгендердин оюна коёлу. Эгерде мен чын эле Дүйшөн байке менен кыз-жигит болуп бир жерде эс алып жүргөн болсом, бизди сүрөткө тартыш үчүн үчүнчү адамдын эмне кереги бар эле дейм да?! Мен эл адамы болгондон кийин күйөрмандарым менен кучакташып түшкөн көп эле сүрөттөрүм бар. Кээ бир жакын тааныштарыма бетимди тийгизип түшүшүм да мүмкүн. Алардын баарын монтаждаса, тим эле укмуш сүрөттөр чыкпайбы?!
Анан да айта кетчү нерсе, Дүйшөн байке 3-ноябрда үйлөнгөнү жатат. Ал тойго конок катары мен да чакырылгам. Аны комментарийлерде кримавторитет дешиптир. Мен, чынын айтканда, андайын деле билбейм. Болгону, Ошто Спорт комитетинин төрагасы экенинен маалыматым бар. Бул окуя боюнча актанып отургум келбейт. Мени ким кандай ойлосо ойлой берсин.
Эми сүрөттөрдү жасагандарды өз колум менен кармап албагандан кийин бул же тигил деп күмөн санаган адамдардын атын атагым келбейт. Балким, бул жорук ошол эле мага жетпей калган жигиттердин да колунан келиши мүмкүн. Азыр жакын курбуларыма да бирдеме деп айтыштан коркуп калдым. Бул сүрөттөр гезитке чыккандан кийин мага телефон чалып ал-акыбалымды сурап калышса эле, ичимден ушул эмеспи деп ойлонуп кетчү болдум...

Сайкалдын сүрөттөрүнөн турган слайд-шоуго байланыштуу Гүлшайыр Садыбакасова өзүнүн жообун жазып жибериптир.
КРнын Эл артисти ГҮЛШАЙЫР САДЫБАКАСОВА:
«МАГА ЖАМАНДЫК КААЛАГАНДАР АЛЫСТАН КЕЛБЕЙТ»
– Мен шоу-бизнесте 35 жылдан бери ак эмгегим менен элге кызмат кылып, жакшы-жаманды көп көргөн, көңүл иренжиткен душмандарга далай жолу кабылган адам катары мындай пастыкты биринчи жолу көрүп отурам. Канчалаган саясатчыларды, коомдук ишмерлерди каралоо максатында бүгүнкү күндүн техникалык мүмкүнчүлүктөрүн колдонуп жасалган ар кандай фотошоптор менен видеоматериалдарды көрүп келсем, эми өзүмдүн башыма түшүп, Кудайдын зор сыноосуна кабылып отурам. Айрыкча 20 жашка чыга элек көчөт кыз Сайкалды көз көрүнөө каралоого, абийирине шек келтирүүгө жан далбастаган кара күчтөрдү Кудайга койдум. Алар Сайкалдын «Братандар» аттуу тасмадагы сүрөттөрү менен Дүйшөн аттуу жигиттин сүрөтүн монтаждап чыгышыптыр. Сайкал экөөбүздү катуу депрессияга түшүрбөй «ак ийилет, бирок сынбайт» деп айтылган таамай кеп кармап калды. Мага жамандык каалагандар алыстан келбейт, тузумду татып, туз баштыгыма түкүргөндөр бар деп шектенем.
Мен, тартипти, каада-салтты катуу кармаган Кыргыз Республикасынын Эл артисти Гүлшайыр Садыбакасова, эч качан кызынын ыплас иштерге аралашпаганына жана ал сүрөттөргө эч кандай тиешеси жок экенине Кудай алдында кепилдик берем. 280ден ашык кызды канаттууга кактырбай, тумшуктууга чокутпай, жаман кеп-сөзгө жеткирбей сактап келгениме эл күбө. Койнумдан чыга элек Сайкал жаман жолго басмак тургай, көчөгө менин уруксатымсыз чыкпайт. Атүгүл жаш, кокустук болуп адашып калбасын дегенимден жанына дайыма Курманбек, Бектур деген агаларын жандатып коёрумду да жашырбайм. Сайкал сүрөтүнө монтаждалып чапталып жаткан Дүйшөн аттуу жигит экөө 4 жыл мурун кикбокс менен чогуу машыгышчу. Эч кандай кримавторитет эмес, жөнөкөй эле кыргыз жигити. Ал баланы жакшы тааныйм. Бул ишти жөн калтырбай, тиешелүү жерге арыз менен кайрылдым. Учурда Ош облустук прокуратура менин арызым боюнча иш козгоду. Козголгон иш аягына чыгарына ишенем.

Сүрөттөгү жигит да Сайкалдын абалын карап кайдигер кала албадыбы, бизге кат жазып жөнөтүптүр.
«БУЛ ИШТИ МАГА ӨЧӨШКӨНДӨР КЫЛЫШЫ МҮМКҮН»
– Сайкал карындашым кыргыз эстрадасындагы мыкты ырчылардын катарын толуктайт. Экөөбүздүн ар башка сүрөттөрүбүздөн чапталып жасалган фотомонтажды көрүп, менин же Сайкалдын душмандарынын кылган иши экенине ынандым. Себеби ал сүрөттөр менин беш жыл мурун Ош стадионунда күрөшкө чыккандагы сүрөттөрүм. Сайкал экөөбүз эч кандай кыз-жигит мамиледе болгон эмеспиз. Көптөгөн иш-чараларда мен спортчу, ал ырчы катары эле саламдашып калчубуз. «Душманыңды алыстан издебе» дегендей, балким, мени көрө албагандардын кылган ишиби деген ой келип жатат.

Бахияна Сатылганова
star@super.kg