16-ноябрда түнкү саат 1:40 чамасында милицияга Аламүдүн районуна караштуу айылдардын биринде киши өлтүрүү болгондугу тууралуу жергиликтүү тургундардан маалымат түшкөн. ИИМдин басма сөз кызматынын билдиришинче, ал жерге алгачкылардан болуп келген оперкызматкер 55-60 жаштардагы адамдын жансыз денесин көргөн. Ошондой эле качып кетүүгө аракет кылган кылмышкерди кармап калганга да үлгүргөн. Оперативдүү тергөө тобу келип, маркумдун өздүгү аныкталып, ал ушул эле үйдүн ээси, 58 жаштагы Ж.Т. болуп чыккан.
Денени кароодо башында көптөгөн кесилген жарааттар бар экени билинген. Ал эми кылмышка шектелип кармалган жигит өлтүрүлгөн адамдын уулу, 1983-жылы туулган Ж.М. болуп чыккан. Маалыматтарга караганда, кылмыш урушуудан улам келип чыккан. Ошол күнү 29 жаштагы Ж.М. туулган күнүн белгилеп, үйүнө мас абалында келген. Атасы уулуна эскертүү бергенде, ал сабап кирген. Токмоктон көчөгө качып чыккан атасын уулу кууп жетип, балта менен чапкылап кирген. Андан кийин башка кийим кийип, көчөгө чыккан уул сөрөй милиция кызматкерине кармалган.
Оперативдүү тергөө тобу тарабынан кылмышка далил буюм – кан болгон балта алынган. Бул факты боюнча Аламүдүн РИИБинин тергөө бөлүмү киши өлтүрүү беренеси боюнча кылмыш ишин козгогон. Учурда кылмышка шектүү убактылуу кармоочу жайга киргизилип, тергөө иштери жүрүп жатат.