Чүй облусунда оор кылмыштын бети ачылганын ИИМдин басма сөз кызматы билдирди. 8-ноябрь күнү Ысык-Ата районунда жолдун боюнда азиат түспөлүндөгү адамдын бычак сайылып, мыкаачылык менен өлтүрүлгөн сөөгү табылган. Анын мурун 12 жолу соттолгон, 56 жаштагы Токмок шаарынын тургуну экени аныкталган. Чүй райондук ИИБи адам өлтүрүү беренеси менен кылмыш ишин козгогон. Иликтөө иштеринин натыйжасында бул кылмышка шектүү аныкталып, ал маркумдун бала кезинен берки досу экени билинген. Ал алгач из жашырып кеткени менен, мыйзамдын укуругу узун экенин сезгенби, милицияга өзү келип, кылмышын мойнуна алган. Учурда иликтөө иштери жүрүп жатат.