Суйкайган сулуу ырчы Бактыгүл Бадыева акыркы кезде чыгармачылыгына көбүрөөк көңүл бура баштаганы байкалууда. Ал тургай жер-жерлерди кыдырып, жеке концерти менен күйөрмандарын кубантып жүрөт. Жакында эле Жалал-Абадда берген концерти аншлаг менен өтүп, көпчүлүктүн алкоосуна арзыганын айтышууда.
Ырчынын чыгармачылыгынан тышкары жеке жашоосу да эл арасында кызыгуу жаратууда. Бактыгүлдүн турмушка чыккандыгы тууралуу кептер айтылып келатканына көп эле болду. Бирок жакында бул кептерди далилдеген бир сүрөт колубузга тийип, анын жообун сурагандар тынчыр эмес. Cүрөттө Бактыгүл нике шакегин тагып жүргөнүн көрүүгө болот. Чын-төгүнүн билүү үчүн ырчы менен байланышсак, «муну да көрүп койдуңарбы? Негизи кыйынсыңар, ээ? Бирок мен буга жооп бере албайм» деп жылмайды. Бактыгүл турмушка чыкса неге болбосун? Кыздын барар жери күйөө дейт. Эгер ырчы кыздын турмушка чыкканы чын болсо, Бактыгүлгө бакыт каалайбыз!