«Тамашоу»долбоорунун түптөлүшүнө 5 жыл болгонуна карабай эми гана көп ийгиликтерди багынтууга жетишти. Эне тилди өнүктүрүү максатында ачылган бул долбоор улам тамыр жайып, учурда 150 команда чогулган. Анан да бир гана Кыргызстанда эмес, Алматыда 4 жолу чемпион аталып, жакында эле Астанада өткөн Эл аралык КВН союзунун Орто Азия Лигасында да чемпион болушту.

– Эрмек, жеңишиңер кут болсун! Сен үчүн бул жыл майлуу-сүттүү болду окшойт?
– Рахмат, айтканыңыз чын. Жыл аягында минтип сиздердин гезиттин тандоосу боюнча «Жылдын супер ТВ персонасы»наамына ээ болдум. Андан тышкары «Тамашоу»курама командасы Астанада өткөн Эл аралык КВН союзунун Орто Азия Лигасында чемпиондукту утуп келди. Кудай буюрса, дагы да багындырчу жеңиштер алдыда деп ойлойм.

– «Тамашоу»Астананы багындыргандагы кубанычың менен бөлүшө кетпейсиңби?
– Жакшы болот. Быйыл Астанада Эл аралык КВН союзунун Орто Азия Лигасынын биринчи сезонунун ачылышы болду. Орусия, Азербайжан, Өзбекстан, Кыргызстан, Армения, Казакстан өлкөлөрүнөн 14 команда катышып, жыл ичинде 5 оюн өттү. Жыйынтыгында «Тамашоу»курама командасы алдыга озуп, чемпион аталдык.

– Бир канча өнүккөн мамлекеттер арасында чемпион болуш кыйынга тургандыр...
– Оюнга расмий түрдө чакыруу алганда эле балдар менен жеңишибиз керек деген максат койдук. Финалга чыгып, чемпиондукка бир кадам калганда да балдарга "эстеп көрсөңөр, буга чейинки 4 оюнда тең биринчиликти алганбыз. Мында да биз жеңишибиз керек!" дедим. Айткандай эле эмгегибиз текке кетпей, кубокту илип кеттик. Триумфатор болгонубузга аябай кубандык, анткени алгачкы расмий сезонунда чемпион катары тарыхта атыбыз калып отурат. Астанага барып ойногонубуз да туура болуптур. Анткени ал жакта алпаруучулук кылган Александр Масляковдун кичүүсү менен КВНдин редактору Михаил Гуликов биздин оюндарды көрүп, расмий түрдө Сочиге чакырышты.

– Сочиге барып ойноп келүүгө да көп каражат керек го.
– Буюрса, Сочиге барганга көп каражат талап кылынат, бирок ал жакта 800гө жакын команданын арасында Эл аралык КВН союзунун Орто Азия Лигасынын чемпиону катары чыгыш да биз үчүн чоң упай болуп берет. Кыргызстандын атынан чыгып жаткандан кийин элибизге да чоң сыймык болушу керек. Эми КМШ өлкөлөрүндө өтчү оюндарга катышып турсак деп жатабыз. Сочиге 14-январда жол тартабыз.

– Эл аралык КВН оюндарына катышып жүрүп, «Тамашоуго»көңүл бөлүнбөй калып жаткан жокпу?
– Жок, андай эмес. «Тамашоу»– биздин пайдубалыбыз. Бул жактан көрсөткөн тамашалар бизге сыртка чыкканда архив болуп берет. Оюн алдында редактордон өтүп жатканда "бул жарабайт" деп айрымдарын кесип салса, кийинки күнү кайра 30 тамаша менен барабыз. Ал да таң калат, "мынча көп тамашаны кайдан табасыңар?" деп. Бир ирет КВНден кийин алар менен жабык кечеде отуруп калып, "Тамашоу" жөнүндө айтып, "150 команда бар" десек таң калышты. Жадакалса Казакстанда андай көп команда жок экен. Андыктан биринчи орунда өзүбүздүн «Тамашоубуз», кыргыз тилин өнүктүрүү турат. Андан кийин гана чет жакта ийгиликтерге умтулабыз.

– Астанадагылар кандай тосуп алышты?
– Биринчи барганда "Тамашоу" деген эмне? Кийимдери кантет?" дей беришчү. Улам жакшы оюн көрсөтүп, атыбыз чыгып, ал жакта да таанылып калдык. Көрүүчү болуп отуруп, жанымдагылар эле "көк кийинген жигиттер – "зверь" деп бизди айтып жатышканын көрүп сүйүндүм. Орусу, казагы болобу, бизди кызуу кол чаап тосуп алып жатышты.

– Казакстандан кыргыздар жеңсе, демек, колу ийрисине тартуу деген болбоптур да...
– Финал биз үчүн өтө коркунучтуу болуп, Армения биз менен тең тайлашып келаткан. Эгер видеодон карап көрсөңөр, чынында, биз жакшыраак оюн көрсөттүк. Финалдык оюнда гана "бир аз тартып жатышабы?" деген ой кетти. А бирок биздин динамика, бий, анан да биатлон сынагынан залды жарып, Армениядан 0,2 упай ашып, утуп кеттик. Эми жакында биз аттанып жаткан Сочидеги оюнда ар бир командага 4 мүнөт гана убакыт берилет экен. Ошол кыска убакытта 800 команданын ичинен өзгөчөлөнүп, өзүбүздү көрсөтүп алсак, сонун жеңиш болмок.

Бизди колдойбуз деген патриот ага-эжелер болсо,0705 09-10-00 номерине чалып,биз менен байланышсын.

Гүлжамал Бөрүкулова
star@super.kg