Редакциябызга «Супер-Инфо» гезитине жана андагы «Таанышуу бурчу» рубрикасы үчүн ыраазычылыгыбызды билдиребиз!» деген билдирүү келип түшкөн эле. Ал абонентке кайра телефон чалып байланышканыбызда Исламбек аттуу окурманыбыз болуп чыкты. Анда эмне себептен ыраазычылык билдирип жатканын өзү айтып берсин.

– Аты-жөнүм Исламбек Амат уулу, 36 жаштамын. Үй-бүлөм менен Баткен шаарында турабыз. Кесибим – милиция кызматкери.
Мындан эки жыл мурун, 2010-жылдын январь айында колума «Супер-Инфо» гезити тийип калды. «Таанышуу бурчуна» телефон номерлерин калтыргандар мени кызыктырды. Арасында аты өзгөчө айым бар экен, Серена деген. Жашы, жашаган аймагы, айтор, бардык жагы мен ойлогондой болуп чыккандыктан, ага телефон чалдым, тааныштык. Толук аты Сергил Урманова экен. Ал кезде Сергил Кербен шаарында медик болуп иштөөчү. Көп өтпөй Ош шаарына барып, экөөбүз жүз көрүшүп, жакындан тааныштык. Жылдызыбыз келишип, май айында баш кошуп, үй-бүлө статусуна ээ болдук.
Азыр бир балабыз бар. Аты Байэл. 20-декабрда бир жашка толот. Чынын айтсам, гезит аркылуу таанышат дегенге көп деле маани берчү эмесмин. Бирок менин бактымды «Супер-Инфо» ачты. Сиздерге үй-бүлөбүз менен терең ыраазычылыгыбызды билдиребиз!

Эмне демекчибиз, кармашкан колуңуздар эч качан үзүлбөсүн!

Салтанат Мукасова
kenesh@super.kg