Гезитибиздин көп жылдык салтына айланып калган «Супер сулуу» сынагы быйыл да өз ишин жыйынтыктап, «Супер сулуу-2012» наамына Гузеля Келдибаева аттуу бийкеч татыды. Гузеля сынак учурундагы кызыктар, өзүнүн дүйнөсү тууралуу окурмандар менен сыр бөлүшөт.

Толук аты-жөнү – Келдибаева Гузеля Жеңишбековна
Туулган жылы – 1995-жыл, 24-июль
Лакап аты – Ляка
Бою – 175 см
Салмагы – 53 кг
Параметри – 83-61-90

– Кандайсың, Гузеля? Жеңишиң кут болсун! Куттуктап келгендердин аягы сууй элекпи?
– Рахмат, жакшы. Ооба, дагы деле куттуктап келип, белектерин берип, жылуу сөздөрүн айтып кетип жатышат. Бүгүн да ошол шылтоо менен үйдө конок тоскону жатабыз.

– «Жеңиш меники болот» деп ойлодуң беле?
– Албетте, сынакка катышкан ар бир кыздын ой-тилегинде жеңүү деген үмүт болсо керек. Мен деле ичимден «ушунча кадам басып, финалга чыккандан кийин жеңсем экен» деп турдум. Бирок ишенген эмесмин. Анткени «Супер сулуу» аталууга кыздардын баарында мүмкүнчүлүк бар болчу.

– Учурда эмне менен алектенесиң?
– Азыр сулуулук салонунда косметолог-визажист болуп иштейм. Сүйүндүргөнү – менин кызматымдан белгилүү адамдар да пайдаланып жатканы. Кийинчерээк сулуулуктун, сүйүүнүн шаары болгон Парижге барып мыкты адистерден сабак алып, тажрыйба алмашып келүү, мекенимде сулуулук салонун ачып, аз да болсо элиме салым кошуу – эң чоң максаттарымдын бири.

– «Супер сулуу» сынагы сага эмне берди?
– Негизи, үй-бүлөм кыргызча сүйлөшөт. Бирок мен кичинемден орус тилдүү бала бакчага, мектепке баргам. Чоңойгондо да чөйрөм жалаң орус тилдүү адамдар болду. Апам үйдөн эжем экөөбүзгө кадимкидей сынак өткөрчү, «бүгүн кыргызча сүйлөшөсүңөр, эгер кимден орусча сөз чыкса, ошол үйдүн баарын жыйнап чыгат» деп. Андай учурда эжем бир аз сүйлөгөнү болбосо, менде үн да, сөз да жок. Ошондуктан кыргызча түшүнөм, бирок сүйлөөдө абдан эле кыйналам. Дегеним, сынактын жүрүшүндө эне тилден жакшы эле кыйналдым. Керек болсо сөздөрдү бирде түшүнсөм, бирде түшүнбөй, үйгө келип апама ыйлаган учурларым болду. Мындайга биринчи жолу кабылып жаткандыктан, намысыма тийип, «кыргыз болуп туруп тилди билбегеним уят, тезинен үйрөнүшүм керек» деп өзүмө максат коюп, кыргыз тилин үйрөтүүчү курска бара баштадым. Албетте, мени кыргыз тилин үйрөнүүгө шыктандырган «Супер-Инфо» гезитине терең ыраазычылык билдирем.

– Кыздардын арасынан өзүңө атаандаш көрө алдыңбы? Эгер сен болбогонуңда, жеңүүчү катары кайсы кызды көрсөтө алат элең?
– Албетте, андай атаандаштар көп эле болду. Бирок ошолордун ичинен мен Гүлназ Касымбекованы утат го деп тургам. Анткени ал чынында эле таланттуу, сулуулугу менен акылы төп келишкен кыз экен. Анан да жаңы таанышканда эле анын адам менен бат тил табыша билгени мага абдан жаккан.

– Сынактын жүрүшүндө бири-бириңерге кыр көрсөткөн учурлар кездештиби?
– Жок, андай нерсе болгон жок. Тескерисинче, бири-бирибизди колдоп, чыгыш бийин үйрөнүүгө ынтымакта, чогуу барып жаттык. Мени таң калтырганы, бир чети капалантканы сынак жыйынтыкталгандагы учур болду. Мени жеңүүчү деп жарыялагандан кийин эле баягы чогуу жүргөн кыздардын айрымдары жүз буруп кетишти. Жадакалса «сен бул наамга татыктуу эмес болчусуң» дегендей комментарийлерди беришти.
Концерттин экинчи күнүндө чыгыш бийин бийлеп жатканда эки кыз көпкө чейин бийлеп коюп, соло бийлегенге мага убакыт жетпей калды. Буга таарынбайм деле. Мындан ары мамилебизди үзбөйбүз деп ишенем.

– Көчөдөн таанып, кол тамга сурагандар болуп жатабы?
– Кол тамга сурабаса да, кээ бир жигиттер «таанышып албайлыбы?» деп тийишип, үйүмө чейин издеп келгендер чыгууда. Мунун айынан апам коркуп, эртең менен жумушка алып келип, кечинде кайра алып кетип жатат. Чынында эле таанышууну каалаган адам болсо, маданияттуу жолун издемек болуш керек.

– Сени «брондоп» койгон жигит бар окшойт...
– Жок. Азыр 17 жаштамын. Жигит күтүүгө бир аз эртерээк болуп калат го. Максаттарымды ишке ашырып, жашоонун ысык-суугун көргөндөн кийин гана жигит тууралуу ойлоном.

– Кичинеңде кандай кыз элең?
– Кой оозунан чөп албаган аябай эле жоош кыз болчу экенмин. Таенем – КРнын Эмгек сиңирген артисти, ырчы Анара Мадиева. Ал мен сүйлөбөй отурсам жаныма келип, «Гузеля, кана, оозуңду аччы, тилиңди сунчу» дейт. Мен анын айтканын кылсам, «ой, айланайын, оозуң, тилиң деги бар экен, бир сүйлөп койчу» деп тамашалап калат. Учурдан пайдаланып, мени колдогон таенеме, апама, эжеме чоң рахмат айтам.

– Ата-энең, бир туугандарың тууралуу айта кетсең. Дегеле кайсы жердин кызы болосуң?
– Ата-энем экөө тең аскер адамдары. Атам – полковник, апам – подполковник. Үч бир тууганмын. Менден бир жаш улуу эжем, үч жаштагы иним бар. Өзүм Көлдүн кызымын.

– Чет өлкөлөрдө болгонсуңбу?
– Жок. Жакында кыштын суук күнүндө экзотикалык өлкөдө эс алып келгени турам. Мындай мүмкүнчүлүк түзүп берген «Супер-Инфого» рахмат айтам.

– Ийгиликтерди багынтып жүрө бер.

Асел Асанова
star@super.kg