«Нике кайып», «Сирень гүлү», «Ханышам» аттуу элге белгилүү ырлардын аткаруучулары – «Кеңеш» тобунун жылдан-жылга популярдуулугу артып барат. Шаңдуу ырлары менен элдин купулуна толуп келаткан «Кеңеш» тобу бүгүн биздин төрүбүздө.

– Саламатсыздарбы, майрамыңыздар менен!
Мүзүр: – Рахмат, бирге болсун!

– Жаңы жылды кандай тостуңуздар?
М.: – Жаңы жыл майрамы мусулманчылыкта катардагы эле күндөрдүн бири болуп эсептелет экен. Андыктан акыркы жылдары Жаңы жылды мурункудай толкундануу, чыдамсыздык менен эмес, катардагы күндөрдөй тосуп калдык.
Гүлмира: – Аяштарыбызга быйыл Жаңы жылды биздин үйдө тособуз деп сөз берип койгон элек, бирок баш тартканга туура келип, аларды да бир аз таарынтып алдык окшойт.

– Кепти «Кеңеш» тобунун түптөлүү тарыхы менен улантсак. Аталган топтун түзүлгөнүнө канча жыл болду?
М.: – Топ 1998-жылы түзүлгөн. Ошол жылы атам Кеңешбек көз жумган эле. Бир жылдан кийин чоң апам «Кеңешим, Кеңешим» деп жүрүп ал да күйүтүнө чыдабай кете берди. Атамдын атын өчүрбөй топ түзүп, атын ошол топко ыйгарам деген максатым бар эле. Ал тилегим да орундалды.

– Сиздерди популярдуу кылган «Нике кайып» деген чыгармаңыздар болду окшойт...
М.: – Сөзү куудул Жакут Сыдыковго таандык. Обону меники. Өзүбүз ырдаган ырлардын дээрлик баарынын эле обондорун өзүм жаратам. Аталган чыгармага тартылган клиптин идеясы Мырза Айдаралиевге таандык. Ошондо биз клип тарткандан эки күн мурун чындап эле Бакыт үйүнөн бир кыз нике кагазына кол койбой качып кетип калган экен. Клип тартканы барсак, ал жердегилер «алдын ала билгенсип» дешип аябай таң калышкан.
Г.: – Мага Мүзүр «мен башында рэп сыяктуу кылып ырдайм, анан кайырмасында сен «ардагым, тандадың» деп кыйкырып ырдайсың» дегенде эле такыр жактырган эмесмин. Ушул кантип ыр болсун деп. Көрсө, Мүзүр билгендей эле айтыптыр.

– Чыгармачылыкта оош-кыйыштар, кыйналган учурлар көп эле болсо керек...
М.: – Кээде Гүлмира «мен топтон чыгам» деп күйдүрөт да. «Ээ, топтон чыгам дегениң, ажырашам, сени менен жашабайм дегениң да» деп айтып калам (күлүп).
Г.: – Чындап эле үйгө, балдарга убакыт бөлгөнгө чамам келбей калат. Ага кошул-ташыл болуп Мүзүр «болбойсуңбу тезден, элдин аялдары баарына жетишет, сен болсо жүрөсүң!» деп ачуусу келип кыйкырганда айтам да. Үй кызматчыбыз жок болсо, мен деле үйдү, балдарды карап, үй кожойкеси болуп отургум келет.

– Продюсерсиз иштөө кыйын эмеспи, бул жаатта кыйналган жоксуздарбы?
М.: – Кыйналганбыз. Бут тосуулар болгон, азыр деле болуп келатат. Бирок Кудайдын көзү түз экен, ушул деңгээлге жеткенибизге шүгүр.
Г.: – Ушул жерден бир нерсени айта кетпесем болбос. Биз «Карагат» деген ырыбыз менен жаңы чыгып жатканда
40 миң сомго форма тиктирип, КТРКнын «Көгүлтүр отуна» катышканбыз. Анда өзүбүз батирде тургандыктан, бул сумма бизге көп болчу. Бизди таңкы саат 5:55те эфирден беришти, элдин баары уктап калганда. Ошондо аябай ыйлагам, «эмнеге бардык жерде адилетсиздик күч алган? Берүүнүн башында баягы эле экрандан түшпөгөн ырчылар. Биринчи үчөө ырдап чыкса, андан кийин жалгыздан чыгып ырдап жатышты. Биз бир жолу чыксак, ошону да ыңгайлуу убакытта коюшпайт» деп.
Кийинки жылы көңүлүбүз калбай дагы катыштык, атын айтпай эле коёюн, бир белгилүү эле продюсер биз мен жапжакшынакай сүйлөшүп жаткан. Бир кесиптеши кулагына бирдемени шыбырап кеткенден кийин эле берки продюсердин бизге мамилеси дароо өзгөрдү. Менин жаныма келип бутумдан башыма чейин карап, «бул эмне деген форма?! Биз мындай форма менен чыгара албайбыз!» деп колу менен көйнөгүмдү көрсөтүп мени уяткарган. Анан да мени сындырганына ушундай ырахаттанып, өзүнө-өзү ыраазы болуп мени тиктеп турганычы! Мен ошол жерде араң ырдап бүттүм. Үйгө жеткиче макияжым батташып, ыйлап келгем. Биздин клиптер КТРКнын форматына туура келбейт экен, мейли чыкпай эле койдук. Бизди «колхоз ырчылар», өздөрүнүкүн «фирманын ырчылары» деп бөлүп коюшат экен. Жайында аянтта концерт болуп, биз сахнага чыкканда эл кимди угары билинди. Баягы «фирманын ырчыларына» ким кол чапты? Эч ким!
М.: – Жакында эле бизди бир тойго чакырышты. Барсак, баары эле башка улуттагы адамдар. Биз эки жагыбызды каранып «адашып келип алган окшойбуз» деп турсак, туура эле барыппыз. Той ээлери уйгурлар экен, атайын биздин «Ханышам» деген ырыбыз үчүн чакырышыптыр. Биз ырдасак, бизге кошулуп ырдашты, сөздөрүн жатка билишет экен, аябай таң калып кайттык.

– Кепти башка багытка буралы, ээ? Сиздер гүл темасында көп ырдайсыздар, себеби эмнеде?
М.: – Анан тикен тууралуу ырдайлыбы? «Коко тике-ен...» деп. Темасы гүл болгону менен, ичи сүйүү тууралуу болуп жатпайбы. Буюрса, далай гүлдөргө арнап ыр жазабыз.
Г.: – Колдон келсе, Мүзүр гүлдөрдүн бардык түрүнө арнап ыр жазсам дейт.

– Кайсы чыгармачыл адамдар менен үй-бүлөлүк тыгыз катыштасыздар?
М.: – Мырза Айдаралиевдин үй-бүлөсү менен эң жакшы достордонбуз. «Биз» тобу, Гүлжигит Сатыбеков, Айнура Салахидинова менен мамилебиз жакшы.

– Өтүп бараткан жыл эмнеси менен эсте калды?
М.: – Беш жылдан бери куруп бүтө албай жаткан үйүбүздү бүтүрүп кирдик. Гастролго чыгып келдик. Ансарий аттуу кыздуу болдук. Гүлмира төрөгүчө аябай шаштыбыз кетти. Анткени «төрөттөн каза болуп калыптыр» деген ушак тарап кетип, мага чалышат, «эмне болду?» деп. Бир чети бул Гүлмиранын психологиясына доо кетирсе, экинчи жактан менин шаштым кетет десең, эртерээк эле аман-эсен көз жарып алса экен деп.
Г.: – Ооба, ошондой сөздөрдү угуп чындап эле өлүп каламбы деген да ойлор кеткен. Улуу балам Медерге чейин эки кызым чарчап калган эле. Медер боюмда болгондо дарыгердин айтканын кылып үйдө жатып, сыртка аз чыгыпмын. Ошондо туугандардын арасынан эле бирөө «Гүлмира төрөбөй эле, баланы багып алыптыр» деп чыгышпадыбы. Негизи, адамдардын фантазиясына таң калса болот.

– Гастролдоп көп жүрөрүңүздөрдү билебиз, мындай учурда балдарыңыздарды кимге табыштайсыздар?
М.: – Ачыгын айтыш керек, гастролго чыкпаган артист – артист эмес. Бизди зарыгып күткөн айыл жергесинде күйөрмандарыбыз бар. Алардын каалоосу менен да эсептешиш керек.
Г.: – Кошулам. Биз гастролго чыкканда балдарды апама таштайбыз. Улуу балабыз Медер эч ырчы болгусу келбейт. Себеби биз көп убактыбызда гастролдордо болуп, ага аз убакыт бөлүп калдык. Ошондон көңүлү калганбы, айтор, чоңойгондо Аяз ата болом дечү эле, эми жакындан бери депутат болом деп калыптыр.

– Кызыктуу маек куруп бергениңиздерге чоң рахмат!

Лунара Бекиева
Адилет Бектуров
star@super.kg