Талас жана Баткен облустары Манастын жердеген мекени тууралуу талашка түшүүдө. ЮСАИДдин жергиликтүү калкты өнүктүрүү боюнча программасынын Баткен облусу боюнча координатору Нурболот Мадымаров: «Баткен облусунун калкынын айтымында, "Манас" эпосундагы айрым окуялар дал ушул жердеги Адеген, Мандеген жана Кара-Тоо деген тоолордо болуп өткөн. Манаска колуктусу Каныкейге Талас аркылуу эмес, Баткен аркылуу баруу оңой болгон»,- деп билдирген. Координатордун айтымында, Баткен шаарынын четинде Таластагыдай эле Манастын элеси түшүрүлгөн «Манас Ордо» комплекси бар. Манастын эстелиги Баткенде 1987-жылы тургузулган. Ал эми калган айкелдер 2002-жылы орнотулган.
Мындай тартышка байланыштуу Талас облусундагы Кыргыз Эл мугалими Бектур Исаков төмөндөгүчө пикирин билдирди: «Манас жалгыз гана Таластыкы же Баткендики деп бөлүү туура эмес. Ал бүткүл кыргыздыкы. Ал эми баатырдын жердеген жери Талас экендиги тээ илгерки тарых барактарында жазылып, эпостогу окуяларда Таластын жерлери деле баяндалып, айтылып келген. Айткандар айтып, тартыша берет».