Кыргыз Республикасынын Эмгек сиңирген артисти Айчүрөк Иманалиева 12-январь күнү шаарыбыздагы кафелердин биринде жакын санаалаштары, кесиптеш, досторунун курчоосунда туулган күнүн белгиледи. Бул күн Айчүрөк айым үчүн кош майрам. Дегенибиз, уулу Арлен, кызы Аэлитаны дал ушул күнү жарык дүйнөгө алып келип, туулган күндү жыл сайын үчөө чогуу белгилешет. Мындай жагымдуу дал келүүчүлүк чанда гана кездешсе керек. Албетте, бул кубантарлык көрүнүш.

– Айчүрөк эже, туулган күнүңүз менен! Бул күндү эң өкүнүчтүү майрам деп да коюшат. "Өмүрүмдүн дагы бир жылы өтүп кетти" деп көңүлүңүз чөккөн жокпу?
– Рахмат. Жок, тескерисинче, ал-күчкө толуп, дагы да көп иштерди бүтүрө турган кезим. Албетте, кадырлуу карылыкка жетип, небере-чөбөрө көргөнгө эмне жетсин. Кудай ошондой куракка жеткирсин. Ар бир жылды артка таштап жатып, «ушул жашка чейин кандай жолду басып өттүм, кандай ийгиликтерди багынтып, эмнелерге жетише албай калдым?..» деген ойлорго чөмүлүп, бир муңайып алам. Ушул жагынан алып караганда туулган күн өкүнүчтүү майрам дегенге кошулам.

– Туулган күндү быйыл кантип, кимдер менен белгиледиңиз?
– Өзүбүздүн жоро-жолдоштордон, чыгармачыл чөйрөдөн куралган беш үй-бүлө дайыма жакшылыктарда чогулуп турабыз, алар келишти. Анан албетте, сахналаш-кесиптештерим да жылуу сөздөрүн айтып, белектерин берип, көңүлдү көтөрүп кетишти.

– 12-январь сиз үчүн эң ыйык күн болсо керек. Анткени уулуңуз, кызыңыз да ушул күнү төрөлгөн эмеспи?
– Албетте, бул Жараткандын мага берген эң чоң белеги деп билем. Биринчи өзүмдүн туулган күнүмдө уулумду төрөп кубансам, экинчи жолу да мындай бакыт кайталанып, кыздуу болгом.

– Туулган күндү үйдө эле белгилеген учурлар болобу?
– Ооба, менде деле кээде шарт жок болуп калат. Андайда үй-бүлөбүз менен ак дасторкон үстүндө жылуу сөздөрдү айтышып эле белгилеп коёбуз.

– Быйыл кандай өзгөчө белектерди алдыңыз?
– Мен роза гүлүн жакшы көргөндүктөн, жыл сайын досторубуз сөзсүз ушул гүлдү тартуулашат. Ал эми жолдошум бриллиант көздүү шакек менен колье белек кылды. Арлен менен Аэлита жумшак оюнчуктарга байып эле жатып калышты. Анан да белгилей кетчү нерсе, туулган күнүбүздү Сапар Сопубековдун кафесинде өткөрдүк. Ал каалоо айтып жатып тамашалай "Айчүрөк эжем болбосо, мен Кызыл-Кыяда пирожки бышырып, манты түйүп эле жүрө бермекмин" деп баарыбызды күлдүрдү. Анан да мага ыраазычылыгын билдирип, "бүгүнкү туулган күндүн чыгымын өзүм көтөрөм" деди. Анын мындай жакшылыгына учурдан пайдаланып чоң рахмат айткым келет.

– Маегиңизге рахмат.

Асел Асанова
star@super.kg