Шоу чөйрөдө «Анжелика Айчүрөк Иманалиеванын үйүнө барып кечирим сураптыр» деген сөз шамалдай тарап, кызуу талкууга алынып жаткан учур. Бул кептин чын-бышыгын билүү максатында Айчүрөк Иманалиевага байланыштык. Ырчы айым: «Ооба, Анжелика күйөөсү менен түндө үйгө келип кечирим сурап кетишти. «Мен жаштык кылып койгон экенмин, баарын эми түшүнүп отурам. Өзүмдү сиздин алдыңызда 100 пайыз күнөөлүү сезем, мени кечириңиз» деди.
Чынын айтсам, өткөн каргашалуу күндөрдү эстегим да келбейт. Үй-бүлөм, бала-бакырам канчалык кыйынчылыктарды башынан өткөрсө да, бул окуяга сабырдуулук менен мамиле кылгам. Мен азырынча бул тууралуу эч нерсе дей албайм, мүмкүн, Анжелика жаштык кылгандыр. Мага убакыт керек»,- деп билдирди.
Бул боюнча Анжеликанын оюн билүү үчүн ырчыга байланышсак, ал: «Күзүндө эле эжеге барып сүйлөшүш керек деп жүргөм. Анан убакыт-сааты келген экен, өткөн жумада, жолдошум жумуштан келгенде таттууларды көтөрүп алып бардык. Таңкы 4-5ке чейин отуруп, жакшы сүйлөштүк, эженин ою жакшы экен. Ким гана катачылык кылбайт, бизден ката кетсе, кечириңиз дедим. Үй-бүлөлүк мамиле кылып, эже менен катташкым келет. Алысыраак адам болсо да билинбейт эле. Эже менен таарынышып, эки жылдай сүйлөшпөй калганым жүрөгүмдү өйүп эле тура берчү»,- деп устатынан кечирим сураганын тастыктады.
Анжелика эмне иш боюнча устатынан кечирим сурашы мүмкүн? Айчүрөк Иманалиеванын «ал каргашалуу күндөрдү эстегим да келбейт» дегенинен улам мындан эки-үч жыл мурунку окуялар эске түштү. Белгисиз эргулдар Кыргыз Республикасынын Эмгек сиңирген артисти Айчүрөк Иманалиеванын өмүрүнө кол салып, үйүнө кире берерде подъездден сабап, бала-чакасын кошуп катуу коркутушканы, машинасын талкалап кетишкени тууралуу маалыматтар айтылган. Ошондо бул окуяны Анжелика менен Айчүрөк Иманалиеванын ортосундагы келишпестиктерге байланыштырышкан эле шоу чөйрөдөгүлөр. Анжелика ушул окуяга байланыштуу кечирим сурадыбы? Чын эле ошол ишти уюштурган беле? Балким, башка пикир келишпестиктерден улам кечирим сурагандыр...

star@super.kg