Баткен гарнизонунун Аскер прокуратурасынын текшерүүсүндө Өзгөчө кырдаалдар министрлигинин Кызыл-Кыя шаарындагы Тоо-кен кырсыктарынан куткаруу кызматынын башчысы, полковник Гапыр Осмонов жана аталган кызматтын каржы кызматынын зардалы, ага лейтенант Жолдубай Абиповго кылмыш иши козголду.
Гапыр Осмонов 2011-жылдын сентябрь айында кызматка дайындалып, ошол күндөн тарта Кызыл-Кыя шаарынын 1-кичи районунда жайгашкан 4-үйдүн 24-батиринде жашамакка 3750 сомдон ай сайын берип туруу үчүн жазуу түрүндө аталган батирдин ээси менен келишим түзгөн. Бирок мамлекет тарабынан батирге деп бөлүнгөн акчаны өз кызыкчылыгына иштетип жиберген.
Ал эми каржы кызматкери Жолдубай Абипов 2012-жылдын 2-июлунда кызматка келип, Кызыл-Кыя шаарынын 1-кичи районунда жайгашкан 11-үйдүн 41-батирине ай сайын 3750 сом төлөп жашоо үчүн келишим түзүп, бирок жогоркудай жорук менен акчаны төлөбөй койгон. Натыйжада бул эки адам «мамлекетке жалпы суммасы 74 500 сомду түзгөн материалдык зыян келтирди» деп айыпталып, учурда тергөө амалдары жүрүп жатат.