Концерттин өткөн орду – Спорт Ордосу, 7-мартта
Башталышы – 19:30 (жарым саатка кечикти)
Көрүүчүлөр – 90 пайыз
Мыкты номерлер – Куудул Бактарбек Абдразаковдун аты жок ыры, Кожакмат Исмаиловдун «Айгүлүм» аттуу ыры
Алып баруучу – Куудул Рысбек Жантөрөев
Билет баасы – 300-500 сом

«Биздин» былтыркы концертине эл агылып келгенинен эки күн эле концерт берсе болмок экен деп айттым эле. Ал сөзүмдү Бактияр иним угуп калганбы же өздөрүнүн оюбу, минтип эки күнгө Спорт Ордосун алышыптыр. Айтпасам деле белгилүү да, эл жети жарымга дейре жайылып, көшөгө ачылганына карабай ордун таппай аркы-терки басып жүрүштү. Бир маалда «Миң кыял» бий тобунун кыз-жигиттери бийлеп чыга келишти. Алардын артынан куудул Рысбек Жантөрөев «Биз» тамаша-шоу концертине куш келипсиздер» деп концертти ачып берди. Бу бала санап отурсам ар чыкканында жок дегенде 2 жолудан «тарс эткендин баары тамаша» деп кайталаганын койбоду. Баарынан да кызыгы, Лейлектен бир пародист жигит ат арытып, жол карытып келиптир. Бир карасам ары чуркап, бир карасам бери чуркап, залды күлдүрө албай көпкө убараланды. Бир маалда Рысбек «ырчы Аскат Исабековду чакырабыз, Аскат Исабеков» десе, «Эми мунусу кайсы ырчы болуп кетти экен?» деп ойлоп кетипмин. Карасам, «Аскат Мусабеков» деп оңдоого шашып Аскат өзү чыгып келатат. Аскаттын ыры бүткөн соң Рысбек кечирим сурап тим болбой «мен гезиттерди көп окуйм да, мэрдин фамилиясын кайра-кайра окуп жүрүп ошондон адашып калдым» деп «оңдоп» койду. Мен буга айран таңмын, бу бизде Исабеков деген мэр бар беле же кургур кулактан кеткенминби деп. Кийин жанымдагылардан сураштырсам, туура эле Иса Өмүркуловду айткандай.
Бир маалда кайра-кайра досум деп пародист Бактарбек Абдразаковду чакырып калды. Жалтыр-жултур кийинген досунун бийлегени элге жага түштү белем, кол чаап отуруп кайра экинчи ирет чакыртышты. 20 мүнөткө созулган антракттан соң алаасына жеткен шым кийген «Эксклюзив» деген топ чыга келди. Алардын Асанкалый Керимбаевдин «Сендей мага» деген ырын акапелла түрүндө аткарганынан кулагым тунуп калды.
Концертке аты аталып, бирок келбей калгандар Расул Маматкулов, Ильяз Агыбай уулу болушса, тизме-пизмеси жок эле куудул Жаныбек Алыкулов, ырчы Данияр Эрматов жана башкалар айымдарды куттуктап кетишти. «Байкасам, мен эле тердеп-кургап бийлей берет экем, эми башкаларды да бийлетейинчи» деген Бактияр аспапта тургандарды да ырдатып «тердетти». Жалпысынан
концерттин өзгөчөлүгү залдын жасалгасында болбосо да, «Биздин» балдарынын жаңы тигилген кара костюмдарында экен деп койдум. Бактияр азамат, эргип ырдап, келген элди кубантты, кол чаптырды.

Толик сынчы