«Супер-Инфонун» Талас облусунун өкүлчүлүгү 28-мартта өз демилгеси менен көрктөндүрүү акциясын өткөрдү. Акцияга «Жаштар үмүтү» коомдук уюмунун жетекчиси жана волонтёрлору, гезитибиздин окурмандары да катышып, шаарды жашылдандырууга өз салымдарын кошушту. Тагыраак айтканда, Талас шаарындагы Кеңешбек Нуржанов көчөсүнө 250 көчөт тигилди.
Ынтымактуу иштеген жаштар бири-бирин тамашалап жатып, убакыттын өткөнүн да сезишкен жок. Буюрса, көчөттөр бой салып өсүшсө, көчөгө көрк берип, абанын таза болушуна салым кошмокчу. Демилгени шаардын мэри колдоп, көчөттөрдү бөлдүрүп бергенин айта кетели.