Алдыга умтулуп жаңы идеяларды баккан, аны элдин пайдасына жумшаган азаматтар жок эмес. Таластын кулуну Анарбек Камчыбеков учурда өзү ойлоп тапкан жер семирткичтери жана организмди тазалоочу суусундуктарын даярдап, бир нече өлкөлөр менен иштешүүдө.

Каарман тууралуу
Туулган жери – Талас району, Көк-Ой айылы
Туулган жылы, күнү – 1961-жыл, 13-июль
Билими – Жалал-Абаддагы кооперативдик техникумун, Москвадагы Тамак-аш өнөр жай институтун бүтүргөн.
Үй-бүлөлүү, 2 уул, 1 кызы бар.

– Саламатсызбы, Анарбек мырза, бул тармакка кандайча аралашып калдыңыз?
– Саламатчылык. Бул тармакка аралашып, эмгектенип калышыма атамдын таасири чоң. Ал кесиби боюнча агроном эле. Мен мектепти, анан жогорку окуу жайын бүтүргөн соң орус окумуштуулары менен бирге 2000-жылы «ЕАP» деген жоопкерчилиги чектелген коом негизделген. Азыр анын президентимин. Алгач ушундай эле аталыштагы жер семирткичти иштеп чыкканбыз. Ал Орусиянын Илимдер академиясында тастыкталган, 2001-жылдан тарта мен ойлоп тапкан жер семирткичти Казакстанда колдоно баштадык.

– Өзүңүз ойлоп тапкан жер семирткичтин даярдалышы, өзгөчөлүгү тууралуу айтып берсеңиз?
– Жер семирткич гумин кислотасынын негизинде суюктук түрүндө даярдалат. 1 литри 60 тонна кыкка барабар. Аны белгилүү өлчөмдөгү сууга аралаштырабыз да, өсүмдүктүн үрөнүнө, жалбырагына себүү аркылуу ишке ашырабыз. Өзгөчөлүгү курамындагы заттардын баары органикалык заттар экендигинде. Натыйжада жердин катмары жакшырат.
Ал эми колдонуу ыкмасы эки түрдүү. Биринчиси – өсүмдүктүн үрөнүнө себүү. Мисалы, 1 тонна төө буурчак үчүн 100 литр сууга 250 грамм кошулманы аралаштырып, шыпыргы менен төө буурчактын үрөнүнө тегиз сээп чыгабыз. Картошка себүү үчүн эгер ал өнүп калган болсо, 300 литр сууга кошуу коркунучсуз. Кошулмага чыланган үрөндү сепкенден кийин анын тамыры тез чыгат. Тамыр канча көп болсо, өсүмдүк ошончолук тез өсөт жана көп түшүм берет.
Экинчиси – жалбыракка чачуу ыкмасы. 300 литр сууга 1 литр өлчөмүндөгү аралашманы чачуу туура. Эгер көрсөтүлгөн өлчөмдөн ашса, анда жалбырактын күйүп калуу коркунучу бар.

– Тажрыйбада жер-жемиштердин адаттагыдан түшүмдүүлүгү арткан учурлар болдубу?
– Жер семирткичтин курамында 20-25 макро жана микроэлементтер бар. Ошонун натыйжасында жер-жемиштин түшүмдүүлүгү артат.

– Организмди тазалоочу алкоголсуз суусундуктарын да ойлоп тааптырсыз... 
– Аталган суусундук 25 өлкөгө тарайт. Алардын ичинде Түркия, Япония бар. А1, А2, А3 деп аталган организмди тазалоочу концентратталган сергитүүчү алкоголсуз суусундуктар чыгарылат. Аты айтып тургандай, организмди шлак, токсин, вирустардан тазалайт. Белгилүү болгондой, адамдын организми 70 жылда 100 тонна тамак-аш, 40 000 литр суюктукту кабыл алат. Мына ошол кабыл алынган тамак-аш калдыктары акырындык менен ичегиде жана денеде шлакка айланып, топтоло берет. Натыйжада кан коюуланып, иммунитет начарлап, организм ооруга чалдыгат. А бул суусундуктар организмди өлгөн клеткалардан, ар кандай тамак-аштын калдыктарынан тазалап, бөлүп чыгаруу системинин иштешин жакшыртат.

Гүлназ Атантаева
talas@super.kg