«Урматтуу «Супер-Инфо» гезити, өзүмдүн жан дүйнөмдү кыйнаган сырымды силерге гана айтууну туура көрдүм. Мен өзүм аялзаты боло туруп, кыздарды жакшы көрөм. Мени кечирип койгула, бирок ушундай болуп жаралып калсам эмне кылам?» деген кат таң калтырууну жаратты. Обу жоктонуп ойноп жаздыбы деп ойлоп, кайра каарманыбызга, балким, психологдун жардамы керектир деп ойлодук.

«ЖАТСАМ-ТУРСАМ КЫЗДАРДЫ ОЙЛОЙМ»
– Атым – Назгүл. Азыр 24 жаштамын. 8-классымда Зарема деген казак кызды жакшы көрдүм. Мектептеги бардык балдар ал кызга ашык болушту. Аябай сулуу кыз эле. Ошол балдардан кем калбай, мен да аны тымызын сүйчүмүн. Бирок ал менин жакшы көрөрүмдү билчү эмес. Ошондон бери 8-9 жыл өттү, бирок ал кызды унута албадым, дагы деле жүрөгүмдө жашап келет.
Мектепти бүткөн соң жогорку окуу жайга тапшырдым. Бишкекте сулуу кыздар көп да, бирок эмнегедир Зарема эсимден кетпей койду. Аны акыркы жолу 3-курста окуп жүргөнүмдө көргөм, ошондон бери көрө элекмин. Азыр да жолуккум келет. Эмгиче ал күйөөгө тийип, балалуу болуп калган чыгар. Күйөөсүнөн талашпайм, бир эле жолу көрсөм дейм. Башка эч нерсе күтпөйм. Ага болгон сүйүүм ушунча катуу экенин билген эмесмин. Барган сайын кыйналып барам, жүрөгүм ооруп бүттү. Эркектер да бир колдонуп, анан качып кетишпей, мендей сүйсө дээр элем...
2-курста окуп жүргөндө Айжан деген таластык кызды жакшы көрүп калдым. Бирок ал бир бала менен сүйлөшүп жүрүп, андан боюнда болуп калды. Ошол окуядан соң мен ага таарынып, аны менен сүйлөшкүм келбей калды. Айжан да менин сүйөрүмдү билчү эмес, ага сырымды айтпай, курбу катары жүрчүбүз. Бирок экөөбүз жолуккан сайын жүрөгүм бат-бат согуп, сүйлөй албай толкунданып, кыйнала берчүмүн. Кээде ал жигити менен ээрчишип келип калганда ичимден аябай кызганчумун. Айжан да менин армандуу махабатым болуп жүрөгүмдө кала берди. Азыр аны көргүм келет, убагында жөн эле таарынганым үчүн кечирим сурап, кучагыма кыссам дейм...
2009-жылы 3-курсту аяктаган соң сүйгөн кыздарымды унутайын деген ой менен күйөөгө тийип алгам. Учурда эки балам бар. Балдарымды ушунчалык жакшы көрөм, ал эми күйөөмдү жек көрөм. Болбойт экен! Бул жашоодо жаратылыш кандай кылып жаратса, ошондой болуп өтөт экенсиң. Менин кыздарды гана сүйөрүмдү күйөөм, а түгүл ата-энем да билбейт. Чечилип, апама айткым келет, бирок уялам. Бир чети кабыл албай коёбу деп да корком. Жатсам-турсам кыздарды ойлойм. Күйөөм менен жашагым келбей калды. Ал мени эркектерден кызганат. Эркектер эмес, кыздардан кызганыш керек экенин ал кайдан билсин?!
Кээде ушундай болуп жаралганча жаралбай эле койсом болмок деп капа тартам. Акыркы күндөрү жашоого болгон кызыгуум жоголуп баратат... Бирок балдарым бар, ошолорду ойлоп, алар үчүн жашап келем. Бөтөндү сүйүп, башка менен жашоо – бул жашоодо эң оор нерсе экен. Урматтуу «Супер-Инфо»! Кыргызстанда мендейлер көппү? Мен эмне кылышым керек? Мага кеңеш берип койгулачы, суранам!

Назгүл, Кара-Балта шары

Психологдун кеңеши
«КҮЙӨӨСҮНӨ БОЛГОН СҮЙҮҮСҮН ӨСТҮРСҮН»
Каарманыбыздын суранычы менен «Триумф-Инфо» психологиялык окуу борборунун психологу НУРЗАДА МАЯМЕРОВАга кайрылдык:
– Бул кыз азыр өзүн-өзү таппай жаткан чагы. Негизи, эркектин да, аялдын да денесинде 2 энергия (эркектик жана аялдык) болот. Эгерде жынысы аялзаты болуп, денесинде эркектик энергия 80 пайызга чейин жетсе, ал кыздарды жакшы көрө баштайт. Аялзатынын мындай болуп калышына кичинекей кезинде алган психологиялык жаракаты да себеп болушу мүмкүн. Мисалы, эгер бала төрөлө элегинде ата-энеси эркек бала төрөлүшүн күтсө же кызды кичинесинен эркек балача тарбияласа ушундай болуп калышы толук ыктымал. Болбосо, каарман эркектер тарабынан сексуалдык зордукка кабылганда да эркектерге болгон нааразычылыгы пайда болуп, кыздарды жакшы көрүп калат.
Эң алгач Назгүл «мен эмнени каалап жатам?» деген суроого жооп бериши керек. Эгер өзү «Жараткан мени ушундай кылып жараткан, мен аялдар менен жашайм» десе да, «мен өзгөрүшүм керек, үй-бүлөмдү сактап калам» десе да алгач психологго же психо-терапевтке кайрылышы керек. Жашоосун оңдош үчүн жок дегенде 6 ай убакыт кетет. Бул аралыкта ал адистердин кеңешин угуп турушу шарт. Антпесе каарманыбыз өз алдынча туура эмес чечим чыгарып алышы мүмкүн. Же болбосо йога, инь-янь сыяктуу чыгыш медитациялары менен алектенип, өз жашоосун оңдосо болот. Анткени бул медитациялар так ошол адамдын ички энергиясын кантип тең салмактуу алып жүрүш керек экендигин үйрөтөт.
Бул лесбияндык эмес, бисексуалдык белгилер. Тартылуу күчү эркектерге да, кыздарга да боло берет. Бирок адам денесиндеги энергияны кайсы жакка жөнөтсө, ошол ишке ашат. Бул айым күйөөсүнө болгон сүйүүсүн өстүрсө болот. Андыктан аракет кылсын. Ал үчүн, жогоруда айтып өткөндөй, психологго кайрылсын. Ал эми азыр ата-энесине же күйөөсүнө бул тууралуу айтса, мындай жорук биздин коомчулукка жат көрүнүш болгондуктан, түшүнбөстүктөр пайда болуп, үй-бүлө уроо коркунучу бар. Бизге деле кайрылса кеп-кеңешибизди айтып, үй-бүлөсүн сактап калууга жардам беребиз.

Нурбек Абдыкадыров
koom@super.kg