Кыргызстанда болуп жаткан жаңылыктарды өз убагында элге жеткирип, маалымдап турган НТС телеканалында «Жаңылыктар» бөлүмү бар. Мына ошол бөлүмдүн жооптуу редактору болуп эмгектенип келген Элизат жаштыгына карабай өз ишине так.

ЭЛИЗАТ ТУУРАЛУУ КЫСКАЧА
Туулган жылы, күнү – 1985-жыл, 30-март
Туулган жери – Кочкор районунун Комсомол айылы
Кызыгуусу – Жаңы кинолорду кууп көрүү
Билими – М.Кашгари атындагы Чыгыш университетинин журналистика факультети
Үй-бүлөдө – 4 бир туугандын үчүнчүсү

– Салам, Элизат. Кичинекей кезиңде эле журналист болом деп чечип койдуң беле?
– Салам, кичинемде сыналгыдан депутаттардын бири-бирин чукуп сүйлөгөндөрүн көрүп «саясатчы, депутат болом» дей берчүмүн. Анда көп нерсени деле түшүнбөйсүң да. Эми гана алардын күндө кубулуп турарын, ар бир сөзүнүн артында кызыкчылыктары бар экенин түшүнбөдүмбү. Мектепти аяктап, борборго келип саясат таанууга тапшырайын десем, «шапка» сурашканынан акчам жетпей өтпөй калдым. Тесттен жакшы упай алсам да, «шапкадан» коркуп калган жаным таза дегенинен журналистикага тапшыргам.

– НТСке кантип келип калгансың?
– Студент кезде эле ар кандай жеке студияларда талапкерлерге ролик жасап, текст жазып жүргөм. Бир күнү эле НТСке иштеп көрөйүн деген ой келди. Анда сюжет кантип жасалат, интервью кандай болот, түшүнүгүм жок эле. НТСке келгенде учурдагы директордун орун басары Айдай Ивакова жол көрсөтүп, устатым болду. Эки жылдай кабарчы болуп жүрүп, жооптуу редакторлукка көтөрүлдүм.

– Экрандын артында да көп түйшүк жатса керек...
– Биздин жумуш абдан эле түйшүктүү, коркунучу да бар. Мисалы, эгер «Дордой» базарында өрт чыкса, 7-кичирайондон ал жакка барып келгениң менен бир саат кетсе, эфирге чыкканы 20 гана секунд болот. Ошол 20 секунддук кадрды бериш үчүн көп эмгек кетет. Кээде саясатчылардан 5-10 мүнөт интервью алып, аны 25-30 секунд кылып кыскартып берсек, «силер атайын өзүңөргө керектүү жерди кесип алдыңар» деп нааразы болушат. Бирок бардык кыйынчылыктарды Бакыт Аманов баш болгон күчтүү команда менен жеңип келебиз.

– Карьера деп жүрүп жеке жашоо артта калган жокпу?
– Баары эле «карьераңды түптөй алдың, жеке жашооңду кара» дешет. Өзүм да ойлойм, ушинтип тытынып жүрө бергеним менен, кийин баары бир сени колдоп турган бирөө керек деп. Кудай буюрса, ойлонуштуруп жатам. Азырынча сүйлөшкөнүм жок. Жумушубуз эртең мененки сегиз жарымда башталып, чыкканча түнкү саат он болот. Ондо кимди табасың? Тапканда да ал сени түшүнөбү?

– Турмушка чыкканда жумушту таштоого туура келсе кантесиң?
– Ошондон корком. Анткени тынбай иштеп көнүп калгам, үйдө отуруп калсам өзүмдү бир канатым сынгандай сезе берем. Бирок аялзаты болгондон кийин баары бир үй-бүлө керек.

– Ата-энең жумушуңа кандай көз карашта?
– Менин кеңешчим да, сынчым да атам. Материал кетери менен чалып «Кызым, бул жериң мындай болуп калыптыр, эмне кылып сүйлөп салгансың?» деп турат. Атам өзү айылдагы карапайым эле тракторчу. «Берип сала бер чындыкты» деп мени менен сыймыктанат дайым. Биз көп митингдерди баштан өткөрүп, курч материалдарды чыгарбадыкпы. Ошондой учурларда «абайла, кызым, башка чаап кетет» деп коркуп турат. Апам болсо китепканачы, сөзү курч, макалдатып сүйлөгөн адам. Менин сөзмөрлүгүм да апамдан калса керек.

Гүлжамал Бөрүкулова
star@super.kg