18-май күнү Швециянын Мальмё шаарында өткөн «Евровидение» сынагында даниялык Эммили де Форест аттуу ырчы айым «Only Teardrops» («Жалаң көз жаштар») аттуу ыры менен жеңишке жетишти. Ал эми 2-орунга азербайжандык Фарид Мамедов татыса, 3-орунга украиналык Злата Огневич илинди.
Сынактан кийин Азербайжандын президенти Ильхам Алиев добуштар калыс эсептелбегенин айтып чыкты. Анткени орусиялык Дина Гариповага алар берген 10 упай эсептелбей, 0 болуп чыккан. Ага карабай Дина 5-орунга нааразы эмес. Мындай ушактар Эммилини да кубалап жүрөт. Нидерландылык маалымат булактары аны плагиаттыкка күнөөлөштү. Себеби жеңишке жеткен чыгарма 2002-жылы жарык көргөн «K-Otic» тобунун «I Surrender» («Мен багынам») аталыштагы ырынын коёндой көчүрмөсү экенин билдиришкен. Мындан сырткары жеңүүчү Улуу Британиянын ханышасы Елизавета II менен тууганчылык жайы бар экенин айтып жүргөн экен, калпы ачылып, ырчы айым уялгандын ордуна «бул жөн гана тамаша болчу» деп кутулуптур.