– Биздин үйдө бир маселе жаралганына көп болду. Башкы себеп – аялымдын семиргенден семирип баратканы. Эгер жашыбыз улуу болсо мейли дейт белем, бирок мен болгону 32де, ал 30 жашта. Ушу 30 жашында, ишенесиңерби, аялым 90 килограмм чыгат. Менден 20 килограммга семиз. Эркектин толуктугу анча көңүлгө алынбайт эмеспи, ал эми аялдын толуктугунун дароо көзгө урунганы жаман экен. Бир жакка ээрчишип барсак эле баары бизди карап күбүр-шыбыр. Анан да «артыңардан аялың апаңдай көрүнүп калат» дешет.
Балабыз да толук. 7 жашта, 3-класстын окуучусундай көрүнөт. Балада күнөө жок, ал таза периште. Бирок баланы да, өзүн да семиртип жаткан аялым болуп жатат. Качан көрбө пирожки, пирог бышырып же картошка кууруп жүргөнү жүргөн. Тамактан башка иш да, хобби да жок баштанып...
Өзүнүн да оозу тыйылбайт, баланын да оозуна тыкканы тыккан. Мен аялымдын даамдуу кылып, түрдөп тамак жасаганына каршы эмесмин, тамак-ашка деле акча аябайм. Бирок тамакты ичип-жегендин чеги бар да. Жаш адамдын жаштай, сымбаттуу көрүнүшү жакшы.
Канча айттым, «диета карма же спорт залга бар, арыкта, семиздиктен оору да келип чыгат, баланы да кыйнабай» деп. «Ии» дейт да, анан эле жок. Кыскасы, арыктагысы да, оозун тыйгысы да келбейт. Ушунун айынан чыр да көбөйдү. Мүнөзү да жаман болуп өзгөрүп баратат.
Ачык айтканда, акыркы убактарда аны менен чогуу отуруп, чогуу жатуу да «противно» болуп калды. Салаңдаган курсагы, буржуйган булчуңдарын көргөндө эле төшөккө болгон «аппетитим» бузулат. Анан да мени «башканы таап алган окшойсуң» деп койгонучу...
Арыктоону ойлобосо, ушинтип семиргенден семирип кете берсе, аны менен жашоо кыйындайт, ошондуктан ажырашайын деп жатам. Же меники туура эмеспи?

Исабек, Бишкек.

– «Ажырашам» деп аялыңызга айтып көрдүңүзбү? Эгер айтсаңыз, ага да көңүл бурбаса, анда ал үй-бүлөнү сактоого аракет жасабаганы. Чынында эле эркекпи, аялбы өз келбетине көңүл буруп, аны жакшы абалда сактоосу – парз.
Аялыңызда психологиялык кандайдыр бир көйгөй бар. Кээ бир адамдар кыжырдануу, стресс, ачуу сезимин тамакты көп жеп басат. Бул туура эмес. Андыктан эгер аялыңыз арыктайм деп аракет жасаса, психологдорго кайрылуусу керек. Булимия (тамагын тыя албагандык) – бул оору десек да болот. Мындай адам жан дүйнөсүнүн түпкүрүндөгү чечилбей келаткан маселелерин чечип, алдыга максатты так коюп, жашоо программасын өзгөртүүсү керек. Эгер аялыңыз арыктап, келбетине көңүл бурууга аракет жасабаса, анда анын тандоосу ошол. Сиз аны эч качан оңдой албайсыз.
Исабек, сизде адамдарды кандай болсо ошондой кабыл ала албагандык бар. Башка адамдарды өзүңүзгө ылайык өзгөрткүңүз келет. Эгер адамды сырткы келбети эмес, ички дүйнөңүз менен жакшы көрсөңүз, анда адамдардын айткан сөзүнө көңүл бурбайт элеңиз. Аялыңыз семиз эмес, мунжу болсо да кабыл алмаксыз.
Ажырашып кетип, андан жаманга туш болуп калбайсызбы? Аялыңыздын семиздиги эле сизге жакпай турабы? Тараза ташына анын жакшы сапаттарын да коюп, жакшылап талдап көрүңүз.

«КҮЙӨӨМ ЖЕТКЕН САРАҢ, КАНТИП ЖАШАЙМ?»
– Күйөөмдүн сараңдыгы көкөйгө тийип бүттү. Акчаны өзү кармайт, дүкөнгө мени менен кошо барат, кассага да акчаны өзү төлөйт. Анан «ушунча акчага тамак-аш алып...» деп наалыганы наалыган. Же ошонусуна жараша тамакты аз жесечи, дасторкондогунун баарын калтырбай күйшөп жейт. Анан азык аларда битиреп күйдүрөт.
Кийим алганга акча сурасаң, жаны чыгып кетет. Качанкы кийимдерим менен жүрөм. Мен декреттик отпускада болгондуктан, баланы карап үйдөмүн. Жолдошум иштеп акча табууда. Үй-бүлөсүн кожоюну болгон соң иштеп багышы керек да. Ал болсо бакканын милдет кылат.
Майрамдарда белекке эч нерсе бербейт. Белекти акчаны бекер коротуу деп эсептейт. 8-Март майрамында да мени менен кызыл чеке болуп жатып 500 сом берди эле, бирок күңкүлдөгөнүнөн кайра колуна карматып койгом. Же эркелеткен жылуу сөзү жок, ыйласаң боору ачып жоошутпайт.
Баш кошо элегибизде анын мындай сараң, таш боорлугун билбеген экем. Эми эмне кылам, ажырашып жаным тынчыйбы?

Гаухар, Ош.

– Сараң, ач көз адам менен жашоо кыйын. Сараң адамдын өзүнө да жашоонун өзү тозок. Ал адамда кедейликтен коркуу сезими турат. Көбүнчө жетишпей, кедей жашагандыктан пайда болот. Бирок сараңдык кээде бай жашаган адамдарда да жолугат. Бул адамдын мүнөзүндөгү терс жагы, анын түпкүрүндө психологиялык бөгөт бар. Ал адам өзү каалап, өзгөрүүгө аракет жасабаса, аны эч ким өзгөртө албайт. Тескерисинче, улгайган сайын сараңдыгы өсүшү ыктымал. Мындай адам ырыскыны качырат. Балким, сиздин катыңызды окуп, арданып оңолсо жакшы, эгер өзүнүкүн туура көрсө, анда ал адам менен жашабай эле койгонуңуз оң.

Канымжан Усупбекова
kenesh@super.kg