«Айпери Кубик кызынын жигитин Айгүл Чалова тартып алыптыр» деген кеп жүрөт шоу чөйрөдө. Бирок ырчы өзү мындай кепти уга электигин айтып таң калууда. Бизге жеткен сөз Айпериге кантип жетпей калды экен деп биз таңбыз.

– Айпери, иштер жакшыбы? Суперфутболго катышам деп жатып аз калганда баш тартууңа эмне себеп болду?
– Рахмат, жакшы. Эл аралык университетте 5-курсту аяктап жатпаймынбы, ошол себептен убактым бир аз тартыш болуп жатат. Анын үстүнө Суперфутбол жума күнү башталды. Мен кичинекейимен жеңил атлетика менен футболго кызыкчумун. Өзүңөр билгендей, «Суперфутбол-2012де» «Мыкты футболчу айым» наамын алгам. Ошондон кийин футболго ого бетер кызыгып, баалап калган элем. Бул жолу ойноого шарт болбой калды.

– Дипломду алсаң, үзүрүн көрөсүңбү же сандыкка катасыңбы?
– Албетте, иштейм. Бул тандоо жалгыз меники эмес. Ата-энем дагы «кызыбыз министрликте иштесин, элчи болуп эл-жер көрсүн» дешти. Кичинемде элчи деген кесип бар экенин билген деле эмесмин. Чемодан көтөрүп, чыкчыйып кийинип жүргөндү жактырчумун. Практикада Тышкы иштер министрлигинде болдум. Ал жактагылар «бизде стажировкадан өтүп, бул жерде кал» деп жатышат. Бул биринчи планым. Андан сырткары Коргоо министрлигинде да бир жылдай эмгектенип, окуума байланыштуу чыгып кеткем. Алар да кайрадан жумушка чакырып жатышат. Кайсы бир бөлүмүндө кызматкер катары иштеп, ошол эле учурда оркестрде солист болуу сунушу менен. Ойлонуп көрүп, бирөөнү тандайм да.

– Айгүл Чалова менен сени жигит талашты деп айтып жүрүшөт...
– Биринчиден, мен Айгүл эже менен сыймын. Анын өзүнүн жашоосу, менин өзүнчө жашоом бар. Экөөбүз жигит талашкан эмеспиз. Мен жигит талашпайм, жигиттер мени талашышат.

– Сүйүү үч бурчтугу деген нерсе бар эмеспи. Бир эле чөйрөдөгү үч адамдын ортосундагы сүйүүгө кабылып көрдүң беле?
– Мындай көрүнүштөр учурда көп эле болуп жатпайбы. Буга башымды оорутпайм. Мисалы, жигитим менден таппаган нерсесин башкадан табышы мүмкүн. Ар бир адам өз бактысын табыш үчүн колдон келген аракетин көрүш керек да, туурабы? Мен буга чейин бирөөнүн турмушуна кийлигишкен эмесмин, мындан ары деле кийлигишпейм. Бирөөнү ушактап, артынан сүйлөгөндү жактырбайм.

– Ал эми сенин жашооңо кимдир бирөөнүн кийлигишүүсүнө кандай карайсың?
– Менин жеке жашоом бул – менин гана жашоом. Кимдир бирөө мурдун тыгышын каалабайм. Анын кандай акысы бар экен, бирөөнүн жашоосуна аралашканга?!

– Ата-энең дагы аралашпашы керекпи?
– Ата-энем аралашпаса болбой калат го. Алар «турмушка чыкканга чейин биздин көзөмөлдө болосуң. Турмушка качан чыгасың, ошол күндөн тарта биз сени күйөөңдүн карамагына өткөрүп беребиз. Каалаганыңдай жаша, сага эч нерсе дебейбиз» дешет.

– Сенин сезимиң менен ойногон, сезимиңди тебелеген жигиттерге кандай реакция кыласың?
– Турмушта сезимим менен ойногон же тебелеген жигиттер болгон жок. Бирок адамдар болду. Алар кимдер? Мен сыйлаган достор, ага-эжелер. Менин атым үчүн же жакында болчу тоюна ырдатыш үчүн сиңдим, карындашым деп пайдалангандарга көп жолуктум. Тойго ырдагандан сырткары бирөөнө машинам же акчам керек болуп калат дегендей. Көбүнчө аялзаты ушундай мамилеге жакын келишет экен. Мындай мамиледен улам менде адамдарга болгон ишеним жоголот. Ал эми жан дүйнөмө сабырдуулук орнойт. Акыркы учурда сабырдуулук деген нерсени пайдалана билишти үйрөндүм. Канчалык меники туура болсо деле ажылдап, ызылдап урушканга барбайм. «Ооба, сиздики туура» деп унчукпай кутулам.

– Өткөн ишке өкүнүп, муну мындай кылсам болмок экен деп бармак тиштеген учур болду беле?
– Өткөн иш өтүп кетти, ошого шүгүр деш керек. Жашоодо кетирген каталарың сени акылдуу кылат. Ал сага сабак болот. Өкүнгөндө эч кандай пайда жок. Болбой калдыбы, ал ошондой болуш керек. Кандай сыноо, кыйноо болбосун, мен ага туруштук берем, көтөрөм.

– Жогоруда сүйлөгөн сөздөрүңөн улам сабырдуу, токтоо боло баштаганыңды байкадым. Мен билгенден сен бетке айткан, эмне ойлосоң ошону балп эттирген мүнөзгө ээ элең. Өзгөрүшүңө эмне себеп болду?
– Бир молдо мага дайыма дем салып берет. Ошол адамдын айткандары жан дүйнөмө жакын болду, жашоомдо дем-күч берди, өзүмдү-өзүм тарбиялаганга үйрөттү. Ошондон улам намаз окуп баштаганыма бир жыл болду. Шариятта сабырдуулук деген сөз чоң мааниге ээ да. Турмушунда бир чоң сокку болсо да намаз окуп калышат деп коюшат го. Бирок менде андай болгон жок.

– Эмнеге дем салып берет?
– Эл ичинде көз тиет, каргайт деген кептер айтылат эмеспи. Ошол чын болуш керек. Мен эл алдына чыгып ырдагандан кийин алым кетип, эч нерсеге көңүлүм келбей, өзүмдү жаман сезем. Адамда жаман аура болот го, мени ошол нерсе курчап алат окшойт. Молдо дем салгандан кийин өзүмө келем.

– Ата-энең учурда дыйканчылык менен алектенип жатыптыр, барып жардам бересиңби?
– Чынын айтайын, болгону бир жолу бардым. Алар мени жардам берсин, талаадагы ишти бүтүрсүн деп эмес, дыйкандын эмгегин бааласын, сезсин деп алып барышты. Кетмен кармап, чөп чапкам, колумдун жооруганы эмдигиче кете элек.

Сүйүн Кулматова
(Айрым сүрөттөр ырчынын өздүк архивинен алынды)
star@super.kg