Пайгамбарыбыз Мухаммед С.А.В. «адамдардын намазы, зикири, кылган ибадаттары өзү үчүн. Бир гана орозо мындай эмес. Анын сообун Алла өзү гана билип берет. Пенде ичип-жегенин, көңүл каалоолорун бир гана Алла үчүн токтотуп койгондуктан, анын сообун өзү берет» деген. Ушундан эле орозонун даражасы бийик экенин билсе болот.

ОРОЗО АЙЫН ЖЕМИШТҮҮ ӨТКӨРҮҮ ҮЧҮН 10 КЕҢЕШ

• Орозо жемиштүү болсун десеңиз, аны бузбоого чын ниеттен аракет кылыңыз.
  Бул айда кара жумушту абайлап кылуу керек.Чаңкап орозону бузуп алуудан сактанган оң.
• Эртең менен эрте тургандыктан, түштөн кийин куш уйку салып эс алууга аракет кылыңыз.
  Бул сизге күч-кубат берет. Убактысын 20 мүaнөттөн ашырбаган дурус.
• Аптапта, күн ысыган учурда сергүү үчүн көлгө же бассейнге түшүүгө болот. Бирок башты салбоо керек.
  Кулактан, мурундан, ооздон суу кирип кетпөөсү үчүн ооз ачканга чейин чыдаган жакшы.
• Күнүнө жок дегенде бир саат Куран китепти окуп коюу керек.Бул орозонун эмне максатта тутулуп жатканын эске салып турат.
• Ар дайым саарлык ичүүдөн эринбеңиз. Такыр мүмкүнчүлүк болбой калганда бир ууртам суу, бир үзүм нан жеп туруп анан оозду жабуу керек. Анткени саарлыкта береке бар.
  Саарлык сапаттуу жана витаминдүү болгону оң.
• Эртеңки кыла турган ишиңизди кечинде пландап алган жакшы.
  Анын ичинен эң маанилүү үчөөнү бөлүп коюңуз. Анткени күч-кубатты үнөмдөп колдонуу керек.
• Ооз ачарда жакшы дуба кылып тамак жеген туура. Мухаммед пайгамбарыбыз үч түрдүү адамдын дубасы кабыл болот деген. Алар: ооз ачарда дуба кылган адамдын, адилеттүү падышанын, жабыр тарткан адамдын дубасы.
• Кадыр түндү ибадат менен өткөргөнгө аракет кылыңыз.
• Азан үнү угулганга чейин тамак жеп бүткөн жакшы.
• Орозо убагында бей-бечараларга жардам бергенге аракет кылуу парз.
  Жок дегенде кимдир бирөөнү үйүнө жеткирүү же жол көрсөтүү менен жакшылык жасоо керек.

ОРОЗО НУН АЛТЫ АДЕБИ
Орозо тутуу жөн гана эртеден кечке чейин ачка болуу эмес, анын адептерине, эрежелерине көңүл буруу. Аалымдар орозонун алты адебин жазышкан.

Орозо учурунда көздү сактоо.
Тактап айтканда, кумарлануу менен аял эркекти, эркек аялды карабасын делген. Орозо кармаган адам оозун ачканга чейин жубайына да кумарлануу менен караганга болбойт.

Тилди сактоо.
Калп айтуу, кимдир бирөөнүн үстүнөн чагымчылык кылуу, ушак айтуу, уруш-талаш жаратууга болбойт. Эгерде орозо тутуп жаткан адамга бирөө катуу айтып уруша турган болсо, «мен орозомун» деп токтотуп, ал маселени кийинкиге калтырганга же жай сүйлөшкөнгө аракет кылганы оң. Эгерде орозо кармап туруп жогорку жоруктарга жол берсе, анын оозу тамак ичип жибергендей эле ачылып калат.

Кулакты сактоо.
Ушак угуу же жагымсыз сөздөргө кулак төшөө да дурус эмес. Уккан адам айткан адамдай эле күнөөгө батары турган иш.

Дененин калган мүчөлөрүн сактоо.
Колду ыплас нерсени кармоодон, бутту туура эмес жакка басуудан, курсакты арам тамак менен толтуруудан сактануу керек. Ким орозо тутуп, бирок арам нерсе менен ооз ачса, оорусу үчүн дары ичип, ал дарыга уу кошуп койгон менен барабар дешет аалымдар. Дары аны айыктырганы менен, уу анын түбүнө жетет.
Андан тышкары көңүлдү ач көздүктөн, жүрөктү дүнүйөнү, акчаны жакшы көрүүдөн сактоо керек.

Курсакты ашыкча толтурбоо.
Ооз ачкан учурда курсакты катуу тойгузбоо керек. Кээде орозомун деп ооз ачарда жана саарлыкта адам катуу тоюп алат. Андай көп тамакты 11 ай бою да ичпейт. Орозодо ачка жүрүүнүн максаты – өзүн ар дайым ачка жүргөндөргө салыштыруу, алардын абалында болуу менен өзүн сыноо, сабырдуулукту сактоо.

Орозонун акыркы адеби.
Ар дайым «менин орозом кабыл болуудабы?» деп коркуп турганы оң. Орозону кимдир бирөөгө көрүнүү же арыктоо максатында эмес, Алланын ыраазычылыгы үчүн кармаңыз.

СААРЛЫКТА ООЗДУ БЕКИТҮҮ ДУБАСЫ:
Навайту ан асуума савма шахри рамадаана минал фажри илал магриби, халисан лиллахи таъала Аллаху акбар.

Мааниси:
Алла Тааланын ыраазычылыгы үчүн таң аткандан күн батканга чейин Рамазан айынын орозосун кармоого ниет кылдым. Аллоху акбар.

ИҢИРДЕ ООЗДУ АЧУУ ДУБАСЫ:
Аллохумма лака сумту, ва бика ааманту, ва аълайка таваккалту, ва аъла рызкика афтарту, фагфирлии маа коддамту ва маа аххарту.

Мааниси:
Алла Таалам, өзүң үчүн орозо кармадым. Өзүңө чындап ишендим, өзүңө таяндым, өзүң берген ырыскы менен ооз ачуудамын. Баштан-аяк кетирген ката, күнөөлөрүмдү кечир.

Нуржамал Жийдебаева
koom@super.kg