Сахнага жаңы аттанганда ар бир ырчы «Кантип өзгөчө болуп чыксам экен?..» деп ойлонот. Эльмурат да бул жаатта жакшы ойлонуп, атына KG деп кошуп алган. Азыр аны көпчүлүк Эльмурат десе тааныбай, KG десе дароо билишет. Мына ошол ырчы жигит бизге бойдок күндөрүнүн үзүмдөрү тууралуу кызыктарды кеп кылып берди.

Туулган жылы, күнү – 1987-жыл, 29-cентябрь
Туулган жери – Ош облусу, Өзгөн району, Красный Маяк айылы
Билими – ОшМУнун бизнес жана менеджмент факультети
Бою – 178 см
Адат сөзү – «Кадимкидей»
Фобиясы – Жылан
Мүнөзүндөгү кемчилиги – Ишенчээктиги
Артыкчылыгы – Жоопкерчиликтүү «немисмин» дейт
Репертуарындагы ырлары – «Сүйүү деңизи», «Сагынамын сени», «Сүйүү таптым» жана башкалар

– Эльмурат, бир кезде продюсер менен иштешсемби деп жүрдүң эле. Оюңдан кайттыңбы кайра?
– Мага айткан сөзү менен кылган иши төп келген, алдабаган адамдар керек. Көбү жакшы идеяларды айтат да, бирок ишке келгенде кылбайт. Ага караганда өзүм чуркасам тез бүтүрөм. Бирөөгө ишенип бекер убакыттан да уттурбайм.

– Бойдок эмессиңби, чынын айтчы, ушул кезге чейин канча кызга сүйүүңдү арнадың?
– 11-классты бүткөндө бир кыз менен сүйлөшүп, ошону чын дилимден жактыргам. Оо, аны индия сүйүүсү деп койсо да болот. Ал кыздын сүрөтүн жаздыгымдын астына катып жатчумун. Андан кийин башка кыздар менен олуттуу мамиле түзө алган жокмун. Же алар чыгармачылыкты түшүнбөйт, же дагы башка себеп болуп калат.

– Ага себеп кыздар эмес эле, талапты катуу койгон өзүң болуп жүрбө?
– Кыз деген кыздай болуш керек, бул менин талабым. Мисалы, кээ бирөөлөр бар, байлык-бийлик, мансабына манчыркап «мен башкарам» деп өздөрүн бийик көрүп алышат. Айрым кыздар уялбай «мага жигит бол» деп айтышат. Мен эркек башым менен алардан корком. Алардын оюнча, мен көз каранды болушум керек. Каалаганын кылып, айтканын аткарсам. Кээ бири менен дос катарында сүйлөшүп койсом эле «Эльмурат менен жүрүп жатам, аяшың» деп тааныштырып башташат.

– Бойдокчулуктан тажаган жоксуңбу?
– Антип деле айта албайм, бирок өзүнчө короо кылып, мал күтүп дегендей, үй-бүлө очогун да ойлош керек болуп калды. Азыр ата-энеме көз каранды эмесмин, бирок кел дегенде келип, кой дегенде коюп, айткандарын кылам. Досторумдун балдары чоңоюп, аяш ата десе жаман болуп жүрөм (күлүп).

– Кайда эс алууну жактырасың?
– Мурун клубдарга барып, бийлеп чер жазганды жактырчумун. Кээде буулугуп кеткенде үйдө эч ким жок болсо ваннага кирип бакырып ыйлап алмайым да бар эле. Болбоду дегенде ээн талаага барып бугумду чыгарып келчүмүн. Азыр ар ким чалып, жумуш көбөйүп чарчап кеткенде үч күнгө телефонду өчүрүп, дааватка чыгып кетем. Келгенде кадимкидей тазалангандай болуп калам.

– Колуңдагы саатыңды ким белек кылган?
– Жакшы көргөн адамым...

– Жакшы көргөн адамым демекчи, жакында той болот деп уктук...
– Ата-энем кыздыкына барып, алар таанышып коюшкан. Азыр эки тарап сүйлөшүп жатышат.

– Кандайча табышып калгансыңар?
– Эжем студент кезимде «жакшы кыз бар, тааныш» деп көп айтчу. Анда көңүл деле бурган эмесмин. Эми минтип турмушка олуттуу караганда эжеме кайрылдым. Таанышсам чын эле жакшы кыз экен...

– Маегиңе рахмат, тоюңарга чакырганды унутпа.
– Силерге да рахмат, албетте!

Гүлжамал Бөрүкулова
star@super.kg