Бакай-Ата районундагы Ак-Дөбө айылынын тургуну Айчүрөк Жумакулова ичи балырга, тегереги таштандыга толгон көлмөнү тазалап, ишке киргизүүгө жетишкен. Бул үчүн учурда жаш балдардын гана эмес, чоңдордун да ыраазычылыгына ээ болууда.

– Бул көлмөнү канча убакыт тазаладыңыз?
– Союз тараган учурдан тарта эле тегерегин таштанды, ичин балыр басып, каралбай калган көлмөнү 2-3 жыл тазаладым. Жалпы аянты 2 гектар, тереңдиги 2 метрден ашат. Тазалаган соң минтип чоң-кичинелердин сууга түшүүчү жайына айланттым. Көлмө жок айылдагы жаш балдар айылды аралап өткөн каналга сууга түшүшчү. Ушундан улам 1 жылда 5 адам сууга агып каза тапкан учурлар болгон. Ошолорду ойлоп отуруп, кир көлмөнү тазалоо идеясы жаралган. Алгач бул идеяны эч ким колдобой койгон. Бирок азыр, Кудайга шүгүр, 49 жылга колдонууга уруксат алгам.
Аба ырайы салкындай баштаганда гана адам азыраак болуп калбаса, күн ысыкта киши батпай калат. Аны көрүп өзүбүзчө кубанып коёбуз. Көлмөнүн тегереги саябан болсун деп атайын 100дөн ашуун өрүк тиктим, терек отургузулду. Мындан тышкары балык чарбасын түзүү максатында чакан жерди даярдатып жатам.

– Бул көлдү тазалоого канча каражат сарпталды?
– Иштегендердин акысын, тамак-ашын эске албаганда,
1 миллион 200 миң сомду чапчыды. Банктан насыя акча алып, кайра аны төлөй берем. Башында жасап жаткан ишимди көрүп кээ бирлери «деги шордуу кемпир экенсиз, башыңызга жүк кылып эмне кыласыз?» дешкен. Бирок менин баштаган ишти аягына чыгарбасам чыдабай турган адатым бар. Андыктан өзүмө «баштадымбы, эми аягына чыгарышым керек!» дедим.
Тегереги таштандылардан арылган соң чакан пляж болсун деп 16 машина кум төгүлдү. Дагы төктүргөнү жатам. Тегерегине таштанды салуучу жашик коюш керек болду. Ойлоп отуруп, кадимки эле кир жуугуч машинанын эскирип, колдонуудан чыгып калгандарын сырдап, сыртына «таштанды» деп жазып, ар жерге койдурдум. Ушинтип акча менен бүтө турганын акча менен, өзүбүздүн колубуздан келгенин өзүбүз бүтүрүп, кемчиликтерин дале бүтүрүп жатабыз.

Эс алуучулардын бири АЙЖАН ШАРШЕНОВАны кепке тарттык.
– Бул жердин ачылганына баарыбыз кубанып жатабыз. Анткени каалаган учурда келип бекер эс алып кетесиң. Суусу таза, чакан болгондуктан, жылуу. Кичинекей балдарыбызды да чочулабай жиберебиз. Анткени анча терең эмес, анын үстүнө эже өзү болот. Эми көлөкөлөп отурганга атайын чатырчаларды алып келип жана электр тарттырып келип муздаткыч иштетип койсо сонун болот. Ысыганда муздак суусундуктарды ичип, балмуздак жеп оңуп калмакпыз.
Айчүрөк эжеге бул өтүнүчтү айтканыбызда «тигилип турган боз үй ошол үчүн алынып келинген. Жакында электр жарыгын киргизип алсак, анан муздаткыч койдуруп, ичин суусундук менен балмуздакка толтуруу оңой эле» деп кошумчалады.

Гүлназ Атантаева
talas@super.kg