Өткөн орду – Спорт Ордосу
Башталышы – (20:15) 1 сааттан ашык кечикти
Көрүүчүлөр – Залдын 100 пайызы
Мыкты номер – Нурландын аккордеондун коштоосунда ырдаган «Чабалекей» ыры
Алпаруучулар – Нурзат Токтосунова, Нурзада Жолдошова
Билет баасы – 300-700 сом

4-5-октябрь күндөрү Нурлан Насип күйөрмандарынын черин ырлары менен жазды. Концерт туура бир сааттан ашык күттүргөнү менен, жүрүшү кечиккенин жууп кетти. Алдын ала ырчы тууралуу кыскача слайд-шоу даярдалып, балакай Нүкүдөн тартып азыркы Нурлан Насип болгонго чейинки сүрөттөрү көрсөтүлдү. Андан соң жарк этип Нурзат менен Нурзада сахнага чыгып, нурлуу концертти ачык деп жарыялашты.
Концерт башталарда сахнага жык толгон элди көрүп «бир кездеги Султан, Мирбектердин доорун сүрүп жаткан экен Нурлан» деп койдум. Анткени азыр ырга эмес, митингге ыктаган элди эки күн катарынан чогултуп концерт коюш оңой иш эмес. Концертте коноктор ырдап, баары эле өз нугу менен келаткан, бир маалда Нурлан Малика-Динаны колунан жетелеп сахнага алып чыкканда аппаратура өчүп калбаспы. Көрүүчүлөр бул учурда бир сыйра уу-дуу болуп, кыйкырып-ышкырып, кол чаап Нурланды жакшы колдоп турушту. Негизи ырчы болгон соң аспаптарда кол ойноткон жакшы эмеспи. 2000 кишиге оңой менен үнү жетпей, унчукпай туруп калган Нурланга дароо аккордеонду алып чыгып бере салышты эле, чыныгы концерт ошондо башталды. Досун жалгыз калтырбайлы дештиби Аваз Акимов, Данияр Эрматов, алпаруучулар чогуу кол чаап, ырчыны сүрөп турушту. Чоң сахнанын ортосунда кичинекей болгон Нурлан Бек Борбиевдин «Cуктанам» аттуу ырын аткарууга киришкенде эл кадимкидей жандана түштү. Буга чейин «кол чаппайсыңарбы» деп улам убара тартып жаткан ырчыга эл сурантпай кол чаап, кошулуп ырдап киришти. Баары бир дүңкү-дүңккө караганда аккордеон, комуз деген кулакка да угумдуу эмеспи. Ошентип эки ырдан соң «техника менен аялзатына ишенип болбойт» деп тамашалаган Нуке кайра концертти улантып кетти.
Коноктордон Бек Борбиев, Данияр Эрматов, Аваз Акимов, Чыңгыз Турдубеков, Асел Кадырбекова куттуктап өттү. Анан да, кызыгы, аягында Нурлан кайсы суйкайган кызды жетелеп чыгып сүйүүсүн билдирет экен деп бир нече көз күтүп калса, кооз сөздөр менен арзуусун элге арнап салбаспы. Ошентип Нурландын ырларына канып, жолубузга түштүк.