«Жаңы толкун-2012» сынагынан кийин кыргыз сахнасында Бек Исраилов деген ысым пайда болгон. Таланттуу жигит аталган сынакка катышкандан соң көп көрүнбөй кеткен эле, эми кайра бир аз тыныгуу алып жаңы ырларды жаздыруу менен алек.

КААРМАН ТУУРАЛУУ
Толук аты-жөнү – Бек Исраилов
Туулган жери – Токтогул району, Сары-Камыш айылы
Туулган жылы – 1992-жыл,12-октябрь
Бою – 182 сантиметр
Салмагы – 63 килограмм
Кызыкканы – Тарыхый чыгармаларга кызыгат
Билими – М.Күрөңкеев атындагы музыкалык окуу жайда 3-курста окуйт
Репертуарындагы ырлары – «Айжаз кыз», «Карындашым», «Жашоо керемет» жана башкалар
Учурда – Жеке ырчы

– Кандай, Бек, биз сени «Жаңы толкун-2012» сынагына катышкандан бери жакшы тааныйбыз, ага чейин эмне менен алектенчүсүң?
– Жакшы, негизи чыгармачылыгымды ыр жаздырып, клип тарттыруудан эмес, чет өлкөлөргө чыгып эл аралык сынактарга катышуудан баштагам. Ал эми «Жаңы толкунга» катышканга чейин 5 жылга жакын кабактарда ырчы болуп иштеп жүрдүм. «Ысык-Көл -2011» эл аралык сынагы менин багымды ачты. Андан 1-орунду алгандан кийин көптөгөн эл аралык сынактарга катышып, ийгилик жараттым.

– «Жаңы толкун» сынагында көрсөткөн жыйынтыгыңа өзүң ыраазы болдуңбу?
– Чынында, ал кезде 19 жашта болчумун, жаш элем. Сынакка өтүп, катышканыма эле сүйүнгөм. Юрмалада башка өлкөнүн чыгармачыл адамдары менен таанышып, ой алмашканым мен үчүн чоң тажрыйба болду. Ал эми көрсөткөн жыйынтыгыма капа деле болгон жокмун. 16 өлкөнүн ичинен 8-орунду алганым жакшы эле көрсөткүч болуш керек. Аталган сынак КМШ өлкөлөрү үчүн абройлуу, мисалы, орустарга «Евровидение» кандай маанилүү болсо, биз үчүн «Жаңы толкун» деле ошондой.

– Кыргыз музыкасына кандай өзгөчөлүк кошоюн деген оюң бар?
– Бизде бир хит ыр жараткандан кийин ал аткаруучунун кийинки ырлары мурункусуна окшошуп кете берет. Балким, музыканын стили, аранжировкасы жактан өзгөрүү киргизе албай жатабыз. Мен да жакында англисче ыр чыгарып, америкалык стилде клип тарттырайын деп жатам, кандайдыр бир өзгөчөлүк кошуп. Билсеңиздер керек, башында Бек Борбиев, Сыймык Бейшекеевдердин музыкасын эле укчук, андан кийин Актан Исабаев таптакыр эле башкача музыка алып келди. Аны да түшүнгөндөр түшүндү, түшүнбөгөндөр калды. Соңунда Мирбек Атабеков пайда болду, ал Актан байке берген нерсени толуктап койду. Азыр кыргыз музыкасы ушул бойдон турат. Бизде ушул багытты бура турган эч ким келе элек, аракеттенгендер бар, бирок натыйжа жок. Биздин шоу-бизнес жаңы музыканын агымына муктаж.

– Кеп нугун жеке жашооңо бурсак. Сендеги ырчылык өнөр кимден берилген?
– Атам Жолдошбек Исраилов – обончу, композитор. Кыргыз эстрада жылдыздарына обон жазып берет, мисалы, Динара Акулова, Азиза, «Жийде» тобу, Роза Шакировалар ырдап жүрүшөт. Ал эми апам Гүлмира Рыспаева – акын, атама караганда белгилүүрөөк (күлүп). Айбек Карымовдун «Ооруп турат жүрөгүм», Гүлжигит Калыковдун «Күттүм сени», Ислам Акматовдун «Периштем» аттуу ырларынын сөзүнүн автору. Ата-энем менен сыймыктанам, менин көпчүлүк ырларым ата-энеме таандык. Жакындан бери мен да обончу болуп кеткем, эки-үч ырыма өзүм обон жаздым.

– Үй-бүлөң жөнүндө да кеп сала кетсең?
– Үй-бүлөдө үч бир тууганбыз, үчөөбүз тең эркек балдарбыз, мен экинчисимин. Атам Ысык-Көл, апам Токтогулдан. Мен шартка байланыштуу Токтогулда төрөлүп калгам. Ошол жылы көп жер титирөө болгон окшойт. 2-3 айлык болуп калганымда дагы жер титиреп, апамдар ызы-чууда мени үйгө унутуп чыгып кетишкен экен. Анан атам титиреп, кыймылдап жаткан үйгө кирип мени көтөрүп чыкканын айтып калат.

– Кыз жандап жүргөн куракка келип калыпсың, барбы «фронтто» көз салып жүргөндөр?
– Мен абдан көп кыздарды сүйдүм. Бир кемчилигим бар болчу, сүйүүмдү такыр билдирбейт элем. Тескерисинче, ал кызды өзүмдү сүйдүргөнгө аракет кылчумун. Көпчүлүк кыздар менин гитарада ойногонумду жактырып эле сүйүп калышчу. Учурда жүрөгүм бош.

КЫСКАЧА...
– Ырларыңдын рейтингин радио, интернеттен карап турасыңбы?
– Ооба, интернеттен ырларымдын рейтингин, калтырылган комментарийлерди окуп, жообун берип турам.

– Өзүңдүн дарегиңе кандай сындарды угасың?
– «Качан семиресиң?» деп көп сурашат. «Чекеңди тырыштырып ырдайсың» деген сындарды угуп калгам. Анан «Неге жоголуп кеттиң?» деген суроону укканда жаман болуп кетем, чын эле жоголуп кеттимби деп.

– Ырчылыктагы максатың эмне?
– Көп жылдар бою элимдин эрке баласы бойдон калгым келет. Келечекте сөзсүз «Эл артисти» деген наамдын ээси болом.

– Эмнеден коркосуң?
– Элдин мен жөнүндө айтылган жаман оюнан, элге жаманатты болгондон корком.

– Сенден күйөрман менен ырчынын ортосундагы мамиледен да көбүрөөк нерсени күткөн күйөрман кыздарың барбы?
– Бар, аларга аябай жакшы мамиле кылам. Баарлашам, сүйлөшүп турам, андан менин эч нерсем кемип калбайт.

– Ыңгайы келгенде бой көтөрүп коёсуңбу?
– Негизи жөнөкөймүн, бирок керек жерде бой көтөрүп коём.

Лунара Бекиева
star@super.kg