Аламүдүн РИИБине 6-октябрда 30-35 жаштардагы азиат түспөлүндөгү аялдын сөөгү табылгандыгы тууралуу маалымат түшкөн. Буга байланыштуу кырдаалдар иликтенип, 1-ноябрда кылмышка шектүү адам катары Аламүдүн районунун тургуну, 21 жаштагы Э.К. колго түшкөн.
Чүй ОИИБинин басма сөз кызматынын маалыматына караганда, каза тапкан аялдын аты-жөнү такталып, ал Жалал-Абад облусунун 31 жаштагы тургуну М.М. экени аныкталган. Сурак иштеринин жүрүшүндө белгилүү болгондой, окуя октябрдын бешинен алтысына караган түнү болгон. Шектүү адам жабырлануучунун үйүнө ууруга кирип, кармалып калганда үй ээси ага каршылык көрсөткөн. Урулган катуу соккудан улам үй ээси каза тапкан. Кылмышкер окуя болгон жерден изин жашыруу максатында сөөктү Аламүдүн суусуна ыргытып, үйдү өрттөп баса берген.
Учурда бул окуя боюнча соттук-медициналык экспертиза жүргүзүлүп, тергөө иштери улантылууда.

Гүлжан Асанкожоева
koom@super.kg