Муңдуу ырлардын атасын тааныткан ырчы Сапар Эркебаев 6-ноябрь күнү Айгерим аттуу бийкечке баш кошту. Жазда тапкан сүйүүсү менен болгон жакшылыгын ырчы мырза дос-туугандары менен бөлүшүп, Ош шаарындагы ресторандардын биринде чоң той өткөрдү. Жаш үй-бүлөгө Айгеримдин атасы Бишкек шаарынан бир бөлмөлүү батир белек кылганын белгилей кетели.

– Сапар мырза, «үй-бүлө – чоң жоопкерчилик» деп коёт эмеспи. Тойдон кийинки сезимдер кандай болуп жатат?
– Мен 30дан ашып калдым, «серьёзный» жашоого, жоопкерчиликтүү турмушка кадам таштап жатам. Буюрса, бардык жакшы күндөр алдыда.

– Келинчегиңиз менен кайдан таанышып калгансыз, кыскача маалымат бере кетсеңиз?
– Келинчегимдин аты – Айгерим, 21 жашта. Экөөбүздүн ортобузда 10 жаш айырма бар. Учурда ал Президенттик академияда 5-курста окуйт. 8 ай мурда Жалал-Абаддан таанышып калганбыз. Бири-бирибизге жылдызыбыз келишип, минтип турмуш куруп отурабыз.

– Тойдун даярдыгына өзүм чуркап жүрөм деген элеңиз, көңүлүңүздөгүдөй өттүбү?
– Баары көңүлдөгүдөй, тоюбузга менин жакын адамдарым, чыгармачылыктагы досторум катышты. Ырчылар келип ырдап эле кетип калбай, бийлеп, кубанычыбызды тең бөлүшүп жүрүштү.

– Айгерим, турмуш куруу сунушун кандай кабыл алдың?
– Кубандым аябай. Сүйүктүүсүнөн мындай сунушту уккан ар бир кыз сүйүнөт болуш керек.

– Сапар байкенин күйөрманы белең?
– Жок, мен мурда аны тааныбайт болчумун. Таанышканыбыздан кийин ырчы экенин билбедимби.

– Жолдошуңдун гастролдоп эки жакка кетишине каршылык кылбайсыңбы?
– Жок, каршы эмесмин, чыгармачылыгын сыйлайм, колдойм. Бирок өзү мындан ары ырдабайм деп жатат.

– Ортоңордогу жаш өзгөчөлүк турмуш курууга тоскоолдук кылган жокпу?
– Жок, андай болбоду. Биз бири-бирибизди бат эле түшүнүп, тил табышып кеттик.

– Маегиңерге рахмат. Бактылуу болгула!

Уулбү Каныбекова
star@super.kg