Ырчы Анжеликанын тун кызы Айыма менен сүйлөшүү үчүн ал барган бала бакчага баш бактым. Бийлеп, ырдап тосуп алган Айыма быйыл 5 жаштан өтүп, көп нерсени түшүнүп калыптыр. Дегеним, суроолорума жооп берерден мурун апасынын көзүн бир карап алып жооп берип жатты.

Туулган жылы, күнү – 2007-жыл, 14-декабрь
Мүнөзү – Боорукер, үйдө катуу урушту жаман көрөт, себеби аябай сезимтал
Кимге жакын? – Апасына да, атасына дагы
Жакшы көрүп жегени – Туздалган бадыраң, суши, роллы
Жакшы көргөн кийими – Өткөн жылы чоң энеси Таластан алып келген көйнөгү
Жакшы көргөн оюнчугу – Апасынын Телефону

– Кандайсың, Айыма? Өзүңдү бизге тааныштырчы.
– Атым – Айыма. Жакында 6га чыгам. Менин сиңдим бар. Аты – Элима, ал 3 жашта. Элима Омарды жакшы көрө-өт. Ал Омарга оюнчук берген да, анан «Омар меники, он мой муж» деп кыйкырган.

– Элима экөөңөр урушпайсыңарбы?
– Жо-ок, ал мени урат, мага кыйкырат. Дептерлеримдин баарын чийип салат. Оюнчук талаша берет.

– Айыма, сонун бийлейт экенсиң. Кайдан үйрөндүң бийлегенди?
– Садиктен.

– Бала бакчага сени ким алып келет?
– Папам.

– Апаң алып келбейби?
– Мамам бир эле жолу алып келди, бүгүн.
Анжелика: – Папам алып келет, мамам алып кетет дебейсиңби (күлүп).

– Мамаңдын жумуштары көп окшойт. Үйдө ким көп иштейт?
– Эжем.
Анжелика: – Кайсы эже-ең?
– Айзада, ал менин эжем.

– Папаң мамаңды кантип эркелетет?
– Эркелетпейт.
Анжелика: – Папаң мени «жанка» деп чакырабы-ы? :)

– Сени үйдө кантип эркелетишет?
– Солнышко, лапочка.

– Элиманычы?
– «Томпоська, помпоська» деп.

– Папаңда акча көппү же мамаңдабы?
– Мамамда.

– Мамаң папаңа акча береби?
– Ооба, сурайт. Алган соң папам «рахмат» дейт. Папам бизди күндө садиктен алып кеткенде дүкөнгө киребиз. Анан сала-ат, пирожки сатып алат. Мен көбүнчө жвачка алам, а Элима «Чупа-Чупс» алат.

– Папаң үйдө тамак жасап, үй жыйнайбы?
– (Көпкө ойлонуп турду) Жок. Ал үйдө телевизор көрөт.
Анжелика: – Дагы шахмат ойнойт силер менен, ээ?
– Мени менен бир да жолу ойногон эмес го.
Анжелика: – Ойнойсуңар го...
– Ооба, бирок мени менен ойнобойт. Айтайынбы папам кайсы жакка көп барат? Бильярд ойногону.

– Ким менен ойнойт?
– Эч ким менен ойнобойт. Ал шашки эле ойногонду билет.

– Тамакты ким жасайт?
– Мамам папам жакшы көргөн тамакты жасайт. Папам болсо камырды жакшы көрөт.

– Папаң кир жууйбу?
– Ооба, кийимдерин жууйт.
Анжелика: – Колу менен жууйбу? Кача-ан? Сен көрдүң беле?
– Ыкы.

– Үйдө мамаң папаңа таарынабы?
– Жо-ок (күлүп). Экөө урушпайт. Папам менен мамам телевизор көрүшөт. Дагы-ы (көпкө ойлонуп туруп калды, акырында эмнени ойлонуп жатканын да унутуп калды окшойт)...

– Мамаң үйдө ырдайбы?
– Ооба.

– Анан силер эмне кыласыңар?
– Атам, Элима, мен болуп бийлейбиз.

– Папаң мамаңа белекти көп береби?
– Жо-ок, акыркы жолу өзүнүн машинасын берген.
Анжелика: – Дагы гүл берет го...

Нуркыз Курманбек кызы
star@super.kg