«Турмуштун өзү тамаша» демекчи, күнүмдүк турмушта боорду эзген окуяларга жолугуп эле жүрөбүз. Атактуулар айылына баш багып, тамашалуу окуяларга кулак салдык.

Асел Кадырбекова, ырчы:«ТЕПКИЧТЕН ТОГОЛОНУП КЕТИП...»
– Мындан 3 жыл мурун көп кабаттуу үйдүн 4-кабатында жашачумун. Үйгө кирип баратсам мага аябай жагып жүргөн жигит туруптур, аны көрүп тайсалдап тепкичтен тоголонуп кеткем. Тиги жигит чуркап келип тургузуп жатпайбы, кулап түшүп бир жерим ооругандан эмес, тиги жигитке уят болгонума чыдабай ыйлап жибергем. Азыр да ушул окуяны эстесем боорум эзилет.

Сүйүн Откеев, режиссёр:«АЯЛЫМА УЯТ БОЛГОМ»
– Эсимде, бир жолу даараткананын жарыгы өчүп калды. Жубайым болсо «оңдоп кой» дейт. Үйдүн кожоюну катары барып, колумдан келбей койду. Ошентип 2 ай жарыгы жок, шам чырак менен киребиз десең. Анан аялым сүйлөнүп отуруп, электрик чакыртып жатпайбы. Ал келип «лампочканы катуураак бураш керек да» деп 200 сомду алды да, кетип калды. Анан аялымдан уялганымды айтпа. Азыркыга чейин жубайым «лампочканы бурай албай койгонсуң» деп тамашалап калат.

Аваз Акимов, ырчы:«ШЫЛКЫЙЫП ӨЛҮМҮШ БОЛГОНДО...»
– Анда 1-класста окучу элем. Балдар менен ойноп жатып, өзүмдөн чоң баланы кар менен башка уруп качкан элем. Тиги баланын жини келип кууп жетип, моюнумдан муунтуп алды. Урдум, тептим, алым жетпей койду. Анан айлам кетип көзүмдү жумуп, башымды шылкыйтып өлүмүш болуп калсам, муунтуп жаткан бала коркуп кетип коё берген. Классташтарыма жолуккан сайын «ошондо эле актёр элең» деп каткырып калышат.

Нуркыз Курманбек кызы
star@super.kg