9-январь күнү шаарда дагы бир жүрөк титиреткен окуя болду. Саналуу убакыттан кийин наристе жытын искөө бактысына ээ болчу кош бойлуу эне арактын айынан мыкаачынын курмандыгы болгон.

6 АЙЛЫК БОЮНДА БАР АЯЛДЫ ӨЛТҮРГӨН
9-январда Бишкек шаарынын Биринчи Май РИИБине шаардын Араван жана Малышев көчөлөрүнүн кесилишинде жайгашкан соода күркөсүнүн ичинен жашы 25-30 чамасындагы аялдын жансыз денеси табылгандыгы тууралуу маалымат түшкөн. Оперативдик иликтөө тобу окуя болгон жерге барып, соода күркөсүнүн ичинен кош бойлуу аялдын сөөгүн табышкан. Каза тапкан келин Нарын облусуна караштуу Ак-Талаа районунун тургуну, 1980-жылы туулган Майрамкүл Долдоева экендиги аныкталды. Ошол эле түнү бул кылмышка шектүү колго түшүрүлгөн. Кылмышка шектүү 1973-жылы туулган Александр Ломакин сурак учурунда мурун канча жолу соттолгонун да эсептеп бере алган эмес.
Иликтөөнүн жүрүшүндө окуя төмөнкүчө болгону билинди. Андан бир күн мурун Александр Ломакин өзү жашаган Беловодск айылынан Бишкек шаарында жашаган досторуна келип, чогуу арак ичишип, алардыкында калып калат. Эртеси баш жазайын десе жанында сокур тыйын жок, эптеп бир нерсе кылыштын амалын ойлойт. Малышев жана Араван көчөлөрүнүн кесилишинде жайгашкан соода күркөсүнө кирип, карызга арак сураса сатуучу аял тааныбаган адамга бербей коёт. Эмне кылышты билбей сыртта турганда, сатуучунун жанында жүргөн тестиер баланын чыгып кеткенин көрөт. Айланада эч ким жок экендигин көргөн ал күркөгө кирет да, чөнтөгүнө сала жүргөн бычагын алып чыгып, сатуучуну бычактап кирет. Кийин белгилүү болгондой, ал сатуучу аялга 13 жолу бычак сайган. Андан соң 2 куту тамеки, 1 бөтөлкө арак, уюлдук телефон жана 2000 сомдун тегерегиндеги акчаны алып, белгисиз тарапка из жашырып кетет. Алган жарааттарынан улам келин каза табат. Анын 6 айлык боюнда болгон.

МАЙРАМКҮЛДҮН ЭКИ БАЛАСЫ ЖЕТИМ КАЛДЫ
Каза тапкан Майрамкүл Долдоеванын артында 8 жаштагы кызы жана 6 жашар уулу калды. Алар үй-бүлөсү менен окуя болгон соода күркөсүнө жакын үйдө жашашчу. Ал эми кылмышка шектүү катары колго түшкөн Александр Ломакин буга чейин 9 жолу соттолгон. Ал акыркы жолу уурулук кылмышы менен 5 жылга соттолуп, 2013-жылдын 28-октябрында эркиндикке чыккан. 3 ай өтпөй оор кылмышка шектелип, кайрадан камакка алынды. Бул кылмыш боюнча Биринчи Май РИИБинин тергөө бөлүмү тарабынан Кылмыш жана жаза кодексинин 97-беренеси (киши өлтүрүү) боюнча кылмыш иши козголуп, учурда тергөө амалдары жүрүп жатат.

Гүлжан Асанкожоева
koom@super.kg